வரவேற்கவேண்டிய தமிழ் நாடு அரசின் 'ஆரோக்கியம்'' திட்டம்!

வரவேற்கவேண்டிய தமிழ் நாடு அரசின் 'ஆரோக்கியம்'' திட்டம்!
-----------------------------------------------------------------------------------------------------------------------------

மக்களின் நோய் எதிர்ப்பு ஆற்றலைக் கூட்டுவது ... கொரோனாத் தொற்றுக்கு எதிரான இன்றைய போராட்டத்தில் முக்கியமானது என்ற கருத்தை இன்று தமிழ்நாடு அரசு முன்னிலைப்படுத்துவது வரவேற்கப்படவேண்டிய ஒன்றாகும்.

பன்னாட்டு நிறுவனங்களின் லாபநோக்கைமட்டுமே கொண்ட மருந்துகளைமட்டுமே சார்ந்திருக்காமல்... எவ்வாறு மக்களின் நோய் எதிர்ப்பு ஆற்றலைக் கூட்டலாம் என்று சிந்திப்பது நல்லதுதானே! இதை எவ்வாறு கூட்டுவது என்பதில் வேறுபாடுகள் இருக்கலாம். அது வேறு!

கபசுர நீர், நிலவேம்பு நீர் போன்றவை மக்களுக்கு வழங்கப்படவேண்டும் என்ற கருத்து நிச்சயமாக வரவேற்கப்படவேண்டியதே ! இன்றைய நவீன மருத்துவம் வளர்ச்சியடைவதற்குமுன்னால்... மக்கள் இதுபோன்ற நோய்த்தடுப்பு ஆற்றலைத் தரும் இயற்கைப் பொருள்களைத்தான் - மஞ்சள், மிளகு, வெந்தயம், இஞ்சி, சுக்கு, வேப்பிலை , தூதுவளை, கண்டங்கத்திரி, துளசி, முருங்கையிலை போன்றவற்றைத்தான் பயன்படுத்தி வந்தார்கள் என்பதே உண்மை!

ஆனால் மிக முக்கியமானது.... அடித்தட்டுச் சமுதாயத்தில் வறுமையில் வாடுகிற ... பசியின் கொடுமையில் சிக்கித் தவிக்கிற மக்களுக்கு மூன்று நேரமும் சத்துள்ள உணவு கிடைக்க வழிசெய்வதே முதல் படி. இதுதான் உடம்பின் நோய் எதிர்ப்பு ஆற்றலுக்கு அடிப்படை! குழந்தைகளுக்கும் முதியவர்களுக்கும் தனிக் கவனம்! முதிய வயதிலும் தளர்ந்த உடம்புடன் கடினமான உடலுழைப்பை மேற்கொள்ளவேண்டிய இன்றைய சூழலை இல்லாமல் ஆக்குதலும் இதில் அடங்கும!

அதற்கு அடுத்தபடி.... வசிக்கும் வீடுகள்! மூட்டைப்பூச்சி, கொசு போன்ற நோய்த்தொற்று பரப்பும் சூழல் இல்லாத வசிப்பிடம்! கழிவறை வசதி! சுத்தமான தண்ணீர்!

மூன்றாவது... வசிக்கும் சுற்றுப்புறச் சூழல்! மாசுபடியாத காற்றோட்டமுள்ள.... சாக்கடைப் பிரச்சினை இல்லாத ... குப்பையில்லாத தெருக்கள்!

நான்காவது, மக்களின் உடல்நலனை அவ்வப்போது கவனித்து... தேவையான மருத்துவச் சோதனைகளுடன்... தேவையான மருத்துவ உதவி அளித்தல்!

இவற்றையெல்லாம் இன்று மக்களுக்கு வழங்கிட தற்போதைய பொருளாதார அமைப்பு இடம் அளிக்குமா? அது வேறு பிரச்சினை! இளைஞர்கள் சிந்திக்கட்டும்!

ஆனால்... இயற்கையான உடம்பின் நோய்த்தடுப்பு ஆற்றல் மிக மிக முக்கியமானது என்ற கருத்து இன்று முன்னிலைப்படுத்தப்படுவது வரவேற்கவேண்டிய ஒன்றே! அதில் ஐயம் இல்லை