ஓராயிரத்தின் வரலாறு

ஓராயிரத்தின் வரலாறு ஓர் ஆயிரம் , ஒரு ஆயிரம் பற்றிய விவாதத்தில் ஒரு கருத்து எனக்குத் தென்படுகிறது. தமிழ் அசையமைப்பு ( யாப்பு அசை இல்லை , மாறாக மொழியசை)  விதிப்படி, ஒரு சொல்லுக்குள் முதல் அசையைத்தவிர, மற்ற அசைகளில் அசையின் தொடக்கமாக ஒரு மெய் நிச்சயமாக அமையவேண்டும். உயிரில் முடிகிற ஒரு சொல் , உயிரோடு தொடங்குகிற ஒரு விகுதி அல்லது சொல்லோடு இணைந்துவரும்போது, உயிரில் தொடங்குகிற விகுதி அல்லது சொல்லுக்கு தொடக்கம் இல்லாமல் ( மெய் இல்லாமல்)  உள்ளது. இதைத் தவிர்க்கவே உடம்படுமெய் தோன்றுகிறது. ( இலை + ஆ = இலையா , தெரு+ஆ = தெருவா ). அதுபோன்று கல் + ஐ என்பதில் ஐ என்ற விகுதிக்கு அசைத்தொடக்கம் இல்லாத காரணத்தினால்தான், ல் ஒற்று இரட்டிக்கிறது ( கல்+ஐ=கல்லை). " கால்" என்ற சொல் ஓரசைச்சொல். அதோடு " ஆ " என்ற விகுதி இணையும்போது, முதல் அசையிலுள்ள "ல்" ஒற்று , அடுத்த அசைக்குத் தொடக்கமாக அமையும்.  அசையமைப்பு விதிகளைச் செயல்படுத்துவதற்காகவே உடம்படுமெய் தோன்றல், ஒற்று இரட்டித்தல் போன்றவை நிகழ்கின்றன. இதில் உயிர் கெடுதலும் அடங்கும். ஒரு + ஆயிரம் என்பதைச் சேர்த்து எழுதும்போது, ஆயிரம் என்ற சொல்லின் தொடக்கத்தில் தொடக்கமான மெய் இல்லை. இதைச் சரிப்படுத்துவதற்கு ,  முந்தைய சொல்லான "  ஒரு "  ( இரண்டு அசைகள் உள்ளன) என்பதில் உள்ள " ரு" என்பதிலுள்ள " ர் "  ஒற்று உதவுகிறது.  தனி அசையாக இருக்கிற " ரு" ( ர் + உ) என்பதில் உள்ள " உ " என்ற உச்சம் கெட்டு, " ரு " என்ற அசை தன் அசைத்தன்மையை இழக்கிறது. பின்னர் தனித்து நிற்கிற " ர் " ஒற்று , " ஆயிரம் " என்ற சொல்லின் முதல் அசையான " ஆ " என்பதன் தொடக்க மெய்யாக அமைகிறது. அப்போது மற்றொரு அசைவிதி செயல்படுகிறது. தனிக்குறிலையடுத்து " ர்" என்ற மெய் வராது. எனவே "ஒ" என்ற குறில் நெடில் ( ஓ ) ஆகிறது.  இப்போது நமக்கு ஓராயிரம் ( ஓர் +ஆயிரம்) என்ற ஒரு சொல்நீர்மையுடைய ஒரு சொல் கிடைக்கிறது. பேச்சுவழக்கில் ஓராயிரம் என்பது ஓர் ஆயிரம் என்று பிரித்து உச்சரிக்கப்பட்டிருக்கலாம். பின்னர் அதன் தாக்கம் எழுத்துவழக்கில் ஏற்பட்டிருக்கலாம்.  இதுவே ஓராயிரத்தின் வரலாறாக இருக்கவேண்டும். ஒரு + உயிர் = ஓருயிர் , ஒரு + உலகம் = ஓருலகம் , ஒரு + எழுத்து = ஓரெழுத்து என்பதைப் பார்க்கலாம். சேர்த்து எழுதும்போது, அசையமைப்பு விதியைக் காப்பாற்றுவதற்காக வந்த ஒன்றுதான் , பின்னர் பிரித்து எழுதும்போதும் ( ஒரு ஆயிரம்) சிலரால் பயன்பட்டிருக்கலாம். இதுதான் ஓராயிரத்தின் வரலாறாக இருக்கவேண்டும். தமிழ் அசையமைப்பின் முக்கியத்துவத்தை விளங்கிக்கொள்ள , மொழியியலில் ஒரு முக்கியக் கோட்பாடாக விளங்கும் Optimality Theory  உதவுகிறது.