சாதிய மோதல்களுக்குத் தீர்வு என்ன?

சாதிய மோதல்களுக்குத் தீர்வு என்ன?
----------------------------------------------------------------

மருத்துவர் பொன்முடி ஐயா அவர்கள் கூறியுள்ளது:

// மாற்றம்வருவதென்பது அதற்கிணையானதன்று. சமூகவமைப்பில் சாதியைப்பொருத்தவரை மாற்றங்கள் நிகழ்ந்துள்ளனவென்பது உண்மையேயென்றாலும் அதனால் சாதிக்கட்டுமானமென்பது எந்தவகையிலும் மாறிவிடவில்லை. ...........................

சாதியை ஒழிப்பதென்பதொன்றும் எளிதானவொன்றாகத்தெரியவில்லை. அது நம் சமூகத்தில் ஒவ்வொருமனிதனுக்குள்ளும் ஆழமாய்ப்பதிந்துள்ளது. இதில் ஆண்பெண்வேறுபாடேதும் இல்லையென்பது எண்ணிப்பார்க்கத்தக்கது.//

எனது பதில் :

மருத்துவர் ஐயா அவர்களே! தாங்கள் கூறியுள்ளவை உண்மைகளே! ஆனாலும் ஒரு கருத்து! 100 ஆண்டுகளுக்குமுன்னர் இன்றைக்கு நாம் பார்க்கிற நேரடியான சாதி மோதல்கள் இல்லை! அதற்குக் காரணம் ... அன்று சாதியக் கொடுமைகள் இல்லை என்பது இல்லை. இன்று இருப்பதைவிட பன்மடங்கு அதிகமாக இருந்துள்ளது. ஒடுக்கப்பட்ட ... அடக்கப்பட்ட .. தாழ்த்தப்பட்ட சாதிகள் பொருளாதார ரீதியாகக் கிராமப்புற நிலப்பிரபுத்துவ அமைப்போடு மிக வலுமையாகப் பிணைக்கப்பட்டிருந்தது. சிந்தனைரீதியாகவும் '' அதுவே இயற்கை'' என்று திணிக்கப்பட்டிருந்தது. (உயர்சாதி) ஆண்டையின் நிலத்தோடு (தாழ்த்தப்பட்ட சாதியின்) அடிமை பிணைக்கப்பட்டிருந்தான். அங்கு நீடித்த வேலைப்பிரிவினையோடு பிணைக்கப்பட்டிருந்தான். அந்தப் பிணைப்பு மிக வலுமையாக நீடித்தது. எனவே ஆண்டைகளை எதிர்த்து, தாழ்த்தப்பட்ட உழைப்பாளிகள் போராட இயலவில்லை. ஆங்காங்கே சிற்சில போராட்டங்கள் நீடித்து இருக்கலாம்.

ஆனால் இன்று அந்தக் கிராமப்புற அமைப்பு .... முழுமையாகத் தகர்க்கப்படவில்லை என்றாலும் ... அது பல முனைகளில் தகர்க்கப்பட்டு ... பலவீனமுடைந்துள்ளது என்பது உண்மை. தாழ்த்தப்பட்ட ... ஒடுக்கப்பட்ட மக்கள் ... நிலத்தோடு ... பிற வேலைப்பிரிவினைகளோடு பிணைக்கப்பட்ட அடிமைச் சங்கிலிகள் இன்று வலுவிழந்துவிட்டன. நகரமயமாக்கமும் மக்களிடையே இட நகர்வும் வளர்ந்துள்ளன. இதன் பயனாக, தாழ்த்தப்பட்ட மக்கள் மனதில் '' உரிமை உணர்வு'' வளர்ந்துள்ளது. இதைப் பார்க்கிற '' உயர் மற்றும் இடைமட்ட'' சாதிகளைச் சேர்ந்த ஆண்டைகள் .... தங்கள் சாதியின மக்களிடையே '' கருத்துரீதியில்'' சாதியத்தைத் தக்க வைக்க முயல்கிறார்கள். எனவேதான், சாதியச் சிந்தனைகளும் சாதிய மோதல்களும் வளர்ந்துள்ளன. பொருளாதார ரீதியில் பலவீனமடைந்துள்ள சாதியமைப்பு... வேலைப்பிரிவினை... தன்னைக் ''கருத்துரீதியில்'' தக்கவைக்க முயல்கிறது. எனவேதான் ''இட ஒதுக்கீட்டை' எதிர்ப்பதையும், '' சாதி மறுப்புத் திருமணங்களை'' எதிர்ப்பதையும், '' சுடுகாட்டுப் பிரச்சனையை'' உருவாக்குவதையும் '' கோயில் வழிபாட்டுப் பிரச்சினையை'' உருவாக்குவதையும் இங்கு 'உயர், இடைமட்ட'' சாதிகளைச் சேர்ந்த ... ஆனால் உயர்வர்க்கத்தினர்... திட்டமிட்டு வளர்த்துவருகிறார்கள்! அவர்கள் ... இந்த உயர்வர்க்கத்தினர் ... தங்களைப் பாதுகாத்துக்கொள்ள.. தங்கள் சாதிகளைச் சேர்ந்த அடிமட்ட வர்க்கத்தைச் சேர்ந்த மக்களைத் தூண்டிவிடுகின்றனர். ''வன்முறையிலாவது சாதியுணர்வைத் தக்கவையுங்கள்... சட்டப் பிரச்சினை வந்தால், நாங்கள் பார்த்துக்கொள்கிறோம்'' என்று ''பின்னாலிருந்து'' சாதிமோதல்களை இயக்குகின்றனர். இதுவே 100 விழுக்காடு உண்மை! இதற்குத் தீர்வு ... அனைத்து சாதிகளிலும் உள்ள அடித்தள மக்கள் ... இந்த ''உயர்வர்க்கத்தினரின்'' சூழ்ச்சிகளுக்குப் பலியாகாமல், ஒன்றிணைந்து , ஒட்டுமொத்தமான அரசியல், பொருளாதார, சமூக மாற்றங்களுக்காகப் போராடுவதேயாகும். தங்கள் சாதிகளைத்தாண்டி, இளைஞர்கள் சமுதாய மாற்றத்திற்காகப் போராட முன்வரவேண்டும்.

Read more »

சாதி அடிப்படையான இட ஒதுக்கீடு தேவையா?

சாதி அடிப்படையான இட ஒதுக்கீடு தேவையா?
-------------------------------------------------------------------------------

எனது முகநூல் பக்கத்தில் ஒரு நண்பர் இட ஒதுக்கீட்டையும் வேலையில்லாத்திண்டாட்டத்தையும் இணைத்து வினாக்களை எழுப்பியிருந்தார். அதற்கு நான் அளித்துள்ள பதில்கள்:

1) // வேலையில்லாத்திண்டாட்டம் என்பது அரசியல்வாதிகளின் அப்பட்டமான பொய் // உலகம் உருண்டை இல்லை என்பதுபோல் தங்களது கூற்று அமைந்துள்ளது. இதற்குமேல் இதில் சொல்வதற்கு ஒன்றுமில்லை. 2) வேலை வாய்ப்பில் சாதி அடிப்படையில் இட ஒதுக்கீடு தொடர்பான தங்களது கூற்று தொடர்பானது. ஆயிரக்கணக்கான ஆண்டுகளாக கல்வி கொடுக்கப்படாமல், உயர்பதவிகள் கொடுக்கப்படாமல், பொருளாதார அடிப்படையிலும், அரசியல் அடிப்படையிலும் பண்பாட்டு அடிப்படையிலும் ஒடுக்கப்பட்டிருந்த சாதிகளின் மக்கள் கடந்த 50 அல்லது 60 ஆண்டுகளாகத்தானே சற்றுத் தலைநிமிர்ந்து நிற்கமுடிகிறது. ஆயிரக்கணக்கான ஆண்டுகளாகப் பொறுத்திருந்தவர்கள் தற்போது இட ஒதுக்கீட்டில் சில சலுகைகளைப் பெறவதில் என்ன தவறு? இதனால் உயர் சாதிகள் என்று அழைத்துக்கொள்ளும் சாதியின மக்களில் ஒரு சிலர் பாதிக்கப்பட்டாலும், சிறிது காலம் பொறுத்திருக்கலாமே! கலெக்டராக ஒரு தாழ்த்தப்பட்ட சாதியைச் சேர்ந்த ஒருவர் பதவியில் அமர்ந்தாலும் இன்றும் அவரைக் கீழ்ப்பதவிகளில் உள்ள உயர்சாதியின மக்கள் கேவலமாகக் கருதுகிறார்களே! கண்கூடாக இது நடக்கிறது. 3) இட ஒதுக்கீடா இன்றைய வேலையில்லாத்திண்டாட்டத்திற்குக் காரணம்? அதற்கான காரணங்கள்பற்றிச் சிந்திக்கலாமே? 4) பொருளாதார நிலையையும் தாண்டி, இன்னும் சாதி அமைப்பானது மக்களைப் பாதிப்பது என்பது உண்மை. 5) ஆயிரக்கணக்கான ஆண்டுகளாக அடியும் உதையும் பட்டுக்கொண்டிருந்த தாழ்த்தப்பட்ட சாதிகளைச் சேர்ந்தவர்கள் இன்று தங்களைப் பாதுகாத்துக்கொள்ள முற்பட்டபிறகுதானே அவர்கள் இன்று காலில் செருப்புகளோடு, சட்டை அணிந்து, தெருக்களில் நடமாட முடிகிறது? சில இடங்களிலாவது!! எனவே தாழ்த்தப்பட்ட, ஒடுக்கப்பட்ட சாதிகளின் மக்களுக்கு இட ஒதுக்கீடு அளிக்கப்படுவதால் மற்றவர்கள் பாதிக்கப்படுகிறார்கள் என்று கூறுவது சரியல்ல.

எனக்கு இப்போது வயது 67 ! சுமார் 60 ஆண்டுகளுக்கு முன்பு நெல்லை மாவட்டைத்தைச் சேர்ந்த கொற்கை என்ற ஊரில் நான் பார்த்த உண்மைச் சம்பவங்கள்! பாட்டி வீட்டில் நிலத்தில் உழுது பயிர் செய்யும் விவசாயித்தோழர், பாட்டியின் வீட்டுக்குள் நுழையமுடியாது. தாழ்வாரத்தில்தான் நிற்கவேண்டும்! அவருக்குச் சாப்பாடு தேவையென்றால், அவரே வாழையிலைகளை வெட்டிவந்து, தாழ்வாரத்தில் உட்கார்ந்து, சாப்பிடவேண்டும்! பாட்டியை நாச்சியார் என்றும் தாத்தாவை நயினா என்றுதான் கூப்பிடவேண்டும. அவ்வளவு ஏன்? பாட்டியின் சிறுவயது ஆண் பேரனைக்கூட நயினா என்றும் பேத்தியை நாச்சியார் என்றுதான் கூப்பிடவேண்டும. பாட்டியின் வீட்டுக் குழந்தைகள் அந்த விவசாயித்தோழரைத் தொட்டுவிட்டால், தனது ஆடைகளைக் கழற்றித் துவைக்கப் போட்டுவிட்டுத்தான், வீட்டுக்குள் குழந்தை நுழையவேண்டும! இதெல்லாம் என்ன கொடுமைகள்? விவசாயித்தோழர் வீட்டுக்குழந்தைகள் பள்ளிக்குச் சென்று நான் பார்ததுகிடையாது. நிலத்தில்தான் வேலைசெய்யவேண்டும். இப்படிப்பட்ட ஒரு மிகக் கேவலமான சூழலிருந்து ... சற்று .... சற்றுத்தான்.... தாழ்த்தப்பட்ட சாதியினராகக் கருதப்பட்ட மக்கள் வெளிவந்துள்ளனர். உயர்கல்வியைப் பெறுவதிலும் அரசு பதவிகளையும் பெறுவதிலும் சில சலுகைகளைப் பெற்றுள்ளனர். அவர்களில் சிலர் செல்வந்தர்களாக இருக்கலாம். ஆனாலும் அவர்களின் தாத்தா, பாட்டிகள் எந்த ஒரு அவலச் சூழல்களில் வாழ்ந்து வந்தனர் என்பதைச் சற்றுச் சிந்திக்கவேண்டும். எனவே இட ஒதுக்கீடு காரணமாக வேலையில்லாத் திண்டாட்டம் நீடிக்கிறது என்றும் திறமையானவர்களுக்கு வேலை கிடைக்காமல் இருப்பதற்கு இதுதான் காரணம் என்று கூறுவதும் சரியல்ல என்பது எனது கருத்து!

அனைத்து சாதிகளிலும் வர்க்கப் பிரிவினைகள் உண்டு. எனவே ஒரு சாதியில் - அது எந்த சாதியாக இருந்தாலும் - உயர் வர்க்கத்தினர் பின்தங்கிய, வர்க்கத்தினரை - செல்வத்தில் பின்தங்கியவர்களை - மதிப்பதில்லை. அது வர்க்க குணம்.... எனவே தாழ்த்தப்பட்ட ... அதேவேளையில் பின்தங்கிய வர்க்கத்தைச் சேர்ந்தவர்கள் - இரண்டு ஒடுக்குமுறைகளுக்கு ஆளாகின்றனர். ஒன்று சாதிய ஒடுக்குமுறை... மற்றொன்று வர்க்க அடிப்படையிலான ஒடுக்குமுறை.. எனவே அனைத்து சாதிகளிலும் உள்ள ஒடுக்கப்பட்ட வர்க்கத்தினர் ஒன்றிணைந்து .... சாதியைத் தூக்கிப்பிடிக்கும் சுயநலவாதிகளையும் எதிர்க்கவேண்டும்... அதேவேளையில் ஒட்டுமொத்தமான அரசியல் பொருளாதார ஒடுக்குமுறைக்கு எதிராகவும் போராடவேண்டும். இந்த இரண்டாவது வகையான போராட்டமே மக்களிடையே நிலவும் சாதி வேறுபாட்டை அகற்றும். இப்போராட்டத்தின் வெற்றியே.... வர்க்க வேறுபாடுகளையும் அகற்றும்... சாதியப் பிரிவினைக்கும் முடிவுகட்டும்.

Read more »

'' சடங்குகளின் தோற்றமும் நீடிப்பும்''

'' சடங்குகளின் தோற்றமும் நீடிப்பும்'' 

( இன்றைய ''சடங்குகளின் '' தோற்றம்பற்றிய ஆய்வில் ஆர்வம் உள்ளவர்களுக்காக மட்டும்! )

பழமையான மனித சமூகத்தில் மனிதன் தான் வாழ்கிற இயற்கையின் செயல்பாடுகள் - பண்புகள் - பற்றிய விதிகளை முழுமையாகப் புரிந்துகொள்ளாத ஒரு சூழல் நிலவியது. விவசாயத்திற்கு மழை தேவை! ஆனால் மழைக்கு அடிப்படை என்ன என்று முழுமையாகத் தெரிந்திராத ஒரு நிலையில்... அன்றைய சமூகம் மழையை வரவழைக்கச் சில நடனங்களை மேற்கொண்டுள்ளது. மக்கள் கூட்டமாக மேகங்கள்போன்று திரண்டு, இடி இடிப்பதுபோல பலத்த ஓசையை எழுப்பிக்கொண்டு, மழைத்துளிகள் தரையில் விழுவதுபோல தாங்களும் விழுந்தால் .. அதாவது மழை என்ற இயற்கைச் செயல்பாட்டைச் செயற்கையாகத் தாங்கள் ஒரு நடனம்மூலம் நடத்திக்காட்டினால், மழை உண்மையில் வந்துவிடும் என்று நம்பினார்கள். அதுபோன்று, வளமுள்ள நிலமாகத் தங்கள் விளைநிலங்கள் ஆகவேண்டுமென்றால், பருவமடைந்த பெண்கள் நிலத்தில ஏர்பிடித்து உழுதால், அவர்களுடைய குழந்தைபெறும் தன்மையானது நிலத்திற்கும் ஏற்றப்பட்டு, நிலமும் பயிர் செழித்துவளரும் பண்பைப் பெறும் என்று நினைத்தார்கள். அதுபோன்று, குழந்தைப்பேறு இல்லாத பெண்களுக்குக் குழைகுழையாக உற்பத்தி செய்யும் வாழைமரத்தின் தண்டைக்கொண்டு சில காரியங்களைச் செய்தால், வாழைக்குரிய பண்பு அந்தப் பெண்களுக்கு வந்துவிடும் என்று நம்பினார்கள். இதில் மிக முக்கியமான ஒன்று .... இதற்கெல்லாம் '' கடவுள்'' என்ற ஒரு சக்தியை அவர்கள் நம்பவில்லை. மாறாக, இயற்கை நிகழ்வுகளைத் தங்களது சில ஆடல், பாடல்கள் மூலம் வரவழைக்கமுடியும் என்று நம்பினார்கள். இதுபோன்ற நிகழ்வுகளின் அடிப்படையில்தான் தாந்திரியம் தோன்றியுள்ளது. பின்னர் மதங்கள் தோன்றியபோது, அவற்றோடு இந்தச் சடங்குகளும் '' பிணைக்கப்பட்டுவிட்டன. ஆனால் மதங்களுக்கு முன்னரே இந்தச் சடங்குகள் தோன்றி நிலவின என்பதுதான் வரலாற்று உண்மை!

ஆனால் பின்னர் இயற்கையின் செயல்பாடுகளுக்கு - மழை, நிலத்தின் செழிப்பு, பெண்ணின் குழந்தைப்பேறு போன்றவற்றிற்கு உண்மையான இயற்கை விதிகள் கண்டுபிடிக்கப்பட்டபின்னரும் ... அறிவியல் வளர்ந்தபிறகும் .... தேவையில்லாத முந்தைய சமுதாயத்தின் ஆடல், பாடல்கள், பிற நம்பிக்கைகள் தொடர்ந்து பின்பற்றப்படும்போதுதான் ... அவை '' சடங்குகளாக'' மாறுகின்றன. அதாவது அவற்றிற்குத் தேவையில்லாத இன்றைய சூழலிலும் அவை நிகழ்த்தப்படும்போது, சடங்குகளாக மாறுகின்றன. நாம் சில சமயம் கூறுவோம் ..'' அவர் நம்மை உண்மையில் வீட்டுக்கு விருந்துக்கு அழைக்கவில்லை. வெறும் சடங்குக்காகக் கூப்பிடுகிறார்'' என்று. அதுதான் ''சடங்கு''!. இன்று நம்மிடையே நீடிக்கும் விவசாயச் சடங்கு, திருமணச் சடங்கு, இறப்பையொட்டிய சடங்கு... என்ற பல சடங்குகளின் அடிப்படைகள் இதுதான். அதுவும் குறிப்பாக விவசாயச் சடங்குகளுக்கும் திருமணச் சடங்குகளுக்கும் நிறைய தொடர்பு உண்டு. காரணம், இரண்டுமே '' மறு உற்பத்தித் தன்மை'' - Fertility - தொடர்பான நிகழ்வுகள்!

இதுபற்றியெல்லாம் இந்திய தத்துவப் பேராசிரியர் தேபி பிரசாத் சட்டோபாத்யா போன்றோர் பல ஆய்வுகளை மேற்கொண்டு பல நூல்களை எழுதியுள்ளார்கள். சட்டோபாத்யாவின் '' LOKAYATHA" என்ற நூல் மிக முக்கியமானது. தமிழிலும் இது மொழிபெயர்க்கப்பட்டு வெளிவந்துள்ளது மற்றொரு பேராசிரியர் பட்டார்ச்யா என்பவரும் பல சில நூல்களை வெளியிட்டுள்ளார்.

Read more »

சுவாதி படுகொலையும் சமூகப் பின்னணியும்...

சுவாதி படுகொலையும் சமூகப் பின்னணியும்...
-------------------------------------------------------------------

அரசியல், பொருளாதாரம், மதம், ஜாதி ஆகியவற்றின் அடிப்படையில் நிலவுகிற ஒடுக்குமுறைகளுக்குச் சமூகக் காரணிகள் காரணம்... இந்தவகை ஒடுக்குமுறைகளில் ஆண், பெண் வேறுபாடு கிடையாது. ஆணும் பாதிக்கப்படுகிறான். பெண்ணும் பாதிக்கப்படுகிறாள்.

ஆனால் மேற்கூறிய பாதிப்புகளோடு .... பெண் என்பவள் சமுதாயத்தில் பெண்ணாகப் பிறந்ததினால் பாதிக்கப்படுகிறாள். இந்தவகைப் பாதிப்பை ஏற்படுத்துவதில் சமூகமானது அரசியல், பொருளாதாரம். மதம் , ஜாதி அடிப்படைகளைப் பார்ப்பதில்லை. பெண்... அவ்வளவுதான்.

கருவிலேயே பெண் சிசுவை அழிப்பது.... குழந்தை வளர்ப்பில்கூட ஆண் குழந்தைக்கு இருக்கிற உரிமைகளைப் பெண் குழந்தைகளுக்கு அளிக்காமல் இருப்பது... . குடும்ப வாழ்க்கையில் கூட பெண்களுக்கென்று வீட்டுவேலைகளை ஒதுக்குவது ( சமையல், வீடு பெருக்குவது, குழந்தை பெறும் கருவியாகப் பார்ப்பது, குழந்த்தைப் பராமரிப்புப் பணியைப் பெண்ணுக்கே உரிய பணியாகப் பார்ப்பது... பட்டியல் நீளும்), குழந்தைப் பேறு இல்லாமலிருந்தால் அந்தப் பெண்ணைப் பலவகையில் அவமானப்படுத்துவது, கணவன் இறந்துவிட்டால் பெண்ணை மிகக் கேவலமான சடங்குகளுக்கு உட்படுத்துவது, பள்ளி, கல்லூரி, அலுவலகம், தெருக்களில் பெண்களைக் காமப்பொருளாகக் கருதிக் கேலிசெய்வது, சில வழிபாட்டுத்தல்ங்களில் பெண்களை அனுமதிக்காமல் இருப்பது, தொலைக்காட்சிகள், திரைப்படங்களில் மனைவிகளைக் கணவர்கள் அடிப்பதுபோலக் காட்டுவது ( உண்மையிலும் வீடுகளில் நடைபெறும் ஒன்றுதான்) ... இவ்வாறு பலவகைகளில் பெண்ணடிமை நீடிக்கிறது.

தாய்வழிச் சமுதாயமாக இருந்த ஒரு காலகட்டத்தில் பெண் '' தெய்வமாக'' கருதப்பட்டாள். சமூகத்தில் பொருளாதாரத் தேவைகளைப் பெற்றுத் தரும் மறு உற்பத்திச் செயலை ( குழந்தைகளைப் பெறுவது) மேற்கொள்ளும் முக்கியமான நபராகக் கருதப்பட்டாள். ,வேட்டைக்குச் செல்லும் ஆண்களுக்கு வேட்டை கிடைக்கும் கிடைக்காமலும் போகலாம்.. ஆனால் காய்கனி பொறுக்குவதிலும், சிறு அளவிலான விவசாய உற்பத்தியில் ஈடுபட்ட பெண்களின் வருமானம் நிரந்தரமானது. இதன் காரணமாகவும் அவளுக்கு உயர்மதிப்பு இருந்தது. பெண்ணைச் சமுதாயம் கொண்டாடியது. ''தெய்வங்களிலும்'' பெண் தெய்வங்களே நீடித்தன.

ஆனால் பொருளாதார உற்பத்தியில் ஆண்களின் பங்கு என்று அதிகரித்ததோ, அன்றே பெண் வீட்டுக்குள் முடக்கப்பட்டாள். ஆண்களுக்குச் சுகம் தரும் கருவியாக.. சொத்துக்கு வாரிசு பெற்றுத் தரும் கருவியாக ஆக்கப்பட்டாள். அன்றே பெண்களின்மீதான வன்முறை தொடங்கிவிட்டது. இன்றுவரை நீடிக்கிறது. பெண்ணின்மீதான ஒடுக்குமுறைகளின் வடிவங்கள் இன்று வேறுபட்டிருக்கலாம்.. ஆனால் அடிப்படையில் மாற்றம் கிடையாது.

பெண்ணடிமை என்பது மனித வரலாற்றின் தொடக்கத்தில் கிடையாது. இடையில் தோன்றியதுதான். அதற்கு இயற்கை அடிப்படை கிடையாது. சமூக அடிப்படையே காரணம்.. அவை அழித்தொழிக்கப்படும்போதுதான்.... பெண் விடுதலை சாத்தியம். அப்போதுதான் கருவறையிலும் வீட்டுக்குள்ளேயும் தொடர்வண்டி நிலையங்களிலும் நடைபெறும் பெண் படுகொலைகள் இல்லாமல் போகும். ஆனால் அதற்காக இன்று சமூக உணர்வுள்ளவர்கள் இதை வேடிக்கை பார்த்துக்கொண்டு இருக்கவேண்டுமென்று நான் கூறவரவில்லை.. முழுமையான தீர்வுபற்றிக் கூறுகிறேன்.

அதாவது, அரசியல், பொருளாதார, பண்பாட்டு ஒடுக்குமுறைகளோடு, இவற்றிற்கு அப்பால் பெண்களுக்கு இன்னொரு ஒடுக்குமுறையும் நீடிக்கிறது என்பதைக் கூறுகிறேன். '' இதில் வர்க்கம், மதம், சாதி கிடையாது' !!!

முடிந்தால் '' குடும்பம், தனிச்சொத்து, அரசு ஆகியவற்றின் தோற்றம்பற்றிய'' பிரடரிக் எங்கல்சு நூலைப் படிக்கவும்.

Read more »

தமிழுக்கு உள்ள உரிமை !

                                                     தமிழுக்கு உள்ள உரிமை !

இந்திய அரசியல் சட்டத்தின் பின்னிணைப்பாக உள்ள 8 ஆவது பிரிவில் இன்றுவரை 22 இந்தியமொழிகள் இடம்பெற்றுள்ளன. அரசியல் சட்டத்தின் உள்ளே இவை இடம்பெறவில்லை. மேலும் இந்தப் பின்னிணைப்பின் நோக்கம் ..... ஆட்சிமொழியாகிய இந்தியைத் தொடர்ந்து வளர்த்தெடுப்பதற்குச் சமசுகிருதத்தை முதன்மையாகவும், எட்டாவது இணைப்பில் உள்ள மொழிகளின் வளங்களை இரண்டாவதாகவும் பயன்படுத்தவதேயாகும். இந்த 22 மொழிகளைச் சேர்ந்த வல்லுநர்கள் ஆட்சிமொழியாகிய இந்தியை வளர்ப்பதற்கான பாராளுமன்றக்குழுவில் இடம் பெறலாம். இந்த உரிமைமட்டுமே 8 ஆவது பிரிவில் உள்ள மொழிகளுக்கு உண்டு!
-------------------------------------------------------------------------------------
PART XVII

CHAPTER IV.-SPECIAL DIRECTIVES

351. Directive for development of the Hindi language.

It shall be the duty of the Union to promote the spread of the Hindi language, to develop it so that it may serve as a medium of expression for all the elements of the composite culture of India and to secure its enrichment by assimilating without interfering with its genius, the forms, style and expressions used in Hindustani and in the other languages of India specified in the Eighth Schedule, and by drawing, wherever necessary or desirable, for its vocabulary, primarily on Sanskrit and secondarily on other languages.

Article 351 of the Constitution
provides that it shall be the duty of the Union to promote the spread of the Hindi language to develop it so that it may serve as a medium of expression for all the elements of the composite culture of India and to secure its enrichment by assimilating without interfering with its genius, the forms, style and expressions used in Hindustani and in the other languages of India specified in the Eighth Schedule, and by drawing, wherever necessary or desirable, for its vocabulary,
primarily, on Sanskrit and secondarily on other languages. It would thus appear that the Eighth Schedule was intended to promote the progressing use of Hindi and for the enrichment and promotion of that language.

Read more »

ஐரோப்பிய ஒன்றியத்தின் மொழிக்கொள்கை

                                 ஐரோப்பிய ஒன்றியத்தின் மொழிக்கொள்கை

ஆங்கில மொழியை அதிகாரப்பூர்வ மொழிகளின் பட்டியலில் இருந்து வெளியேற்ற ஐரோப்பிய யூனியன் முடிவு!

ஐரோப்பிய யூனியனில் இருந்து கடந்த ஜூன் 24-ம் தேதி இங்கிலாந்து வெளியேறியது.

கருத்து வாக்கெடுப்பில் 51.9 சதவீதம் பேர் ஆதரவு அளித்ததை தொடர்ந்து, ஐரோப்பிய யூனியனில் இருந்து வெளியேறும் முடிவை அந்நாடு எடுத்துள்ளது.

இது உலக அரங்கில் பெரும் அதிர்வுகளை ஏற்படுத்தி உள்ளது. இந்நிலையில், இங்கிலாந்தின் முடிவை தொடர்ந்து ஆங்கில மொழியை ஐரோப்பிய யூனியன் நாடுகளின் அதிகாரப்பூர்வ மொழிகளில் பட்டியலில் இருந்து வெளியேற்ற முடிவு செய்துள்ளதாக கூறப்படுகிறது.

எனினும், ஜெர்மனி மற்றும் பிரான்ஸ் நாடுகள் இந்த விவகாரத்தில் மறுப்பு தெரிவிப்பதாக கூறப்படுகிறது.

ஐரோப்பிய யூனியனில் 24 மொழிகள் ஆட்சிமொழிகளாகவும் பயன்பாட்டு மொழிகளாகவும் இருக்கின்றன. ஐரோப்பிய யூனியனில் உள்ள ஒவ்வொரு குடிமகனும் ஐரோப்பிய யூனியனின் ஆவணங்களைத் தனது தாய்மொழியில் பெறும் உரிமை உண்டு. தனது தாய்மொழியியலேயே எந்தவொரு மடலும் எழுதலாம். அதற்கானப் பதிலையும் தனது தாய்மொழியிலேயே பெறமுடியும். இதற்காக 1750 மொழியியலாளர்களும் 600 பிற அலுவலர்களும் பணிபுரிகின்றனர். மேலும் 600 முழுநேரப் பணியாளர்ளும் 3000 பகுதிநேர ஆர்வலர்களும் பணிபுரிகின்றனர். உலகத்திலேயே மிகப்பெரிய மொழிபெயர்ப்பு அமைப்பாக இது நீடிக்கிறது. மேலும் விவரங்களுக்குக் கீழ்க்கண்ட இணையதளத்தைப் பார்க்கவும்.

http://ec.europa.eu/languages/policy/linguistic-diversity/official-languages-eu_en.htm

இந்தியாவில் 22+1 மொழிகள் ( அரசியல் சட்டப்ப்டி) உள்ளன. அனைத்து மொழிகளையும்ஆட்சிமொழிகளாக ஆக்கிவிட்டு, ஐரோப்பிய யூனியனில் இருப்பதுபோல 2000 அல்லது மூவாயிரம் பணியாளர்களை வைத்துக்கொண்டு, அவரவர் மொழியில் ஒவ்வொருவரும் கருத்தாடல் மேற்கொள்ள வழிவகை செய்யமுடியும் அப்படியிருக்க ..... தற்போது இந்த மொழி ஜனநாயகத்தை ஏற்று, நடைமுறைப்படுத்த ஏன் நடுவண் அரசு விரும்பவில்லை? நடைமுறைச் சிக்கல் இல்லை. இந்திமொழி ஏகாதிபத்தியம்தான் காரணம்... ஆதிக்க உணர்வுதான் காரணம்...

உண்மையில் மக்கள் உணர்வை மதிக்கக்கூடிய அரசுகளாக இருந்தால் .... தாங்கள் கூறுவது நடக்கும். இப்பிரச்சினையில் மக்கள் பொதுவாக்கெடுப்புக்கு அரசியல் சட்டத்தில் இடம் இல்லாமலிருந்தாலும், ... மக்களின் போராட்டங்களால் அப்படி ஒரு வாக்கெடுப்பை நடத்தவைக்கலாம். அனைத்து மொழிகளைச் சேர்ந்த மக்களும் ஒன்றுபட்டால்... இது நடக்கும். நடக்கவைக்கமுடியும்.

ஏற்கனவே இதற்கான நல்லதொரு முயற்சியை நண்பர் ஆழிசெந்தில்நாதன் அவர்கள் மேற்கொண்டுவருகிறார். அதற்கான ஒருங்கிணைப்பு மாநாடு ஒன்றையும் நடத்தியுள்ளார். அதைத் தொடரலாம்.https://www.facebook.com/.../PromoteLinguisticEq.../members/

Read more »

இடையினம் என்பது உயிரா அல்லது மெய்யா?

தமிழ்மொழி அமைப்பின் சிறப்புகளில் சில (2)..... (தமிழிலக்கணத்தில் ஆர்வமுள்ளவர்கள் படிக்கலாம்.. மற்றவர்களுக்கு மிகவும் அலுப்பு(த்) தட்டலாம் ... முன்னெச்சரிக்கை ... மன்னிக்கவும். 

தமிழ் ஒலியன்களில் ( எழுத்துகளில்) இடையினம்பற்றிய ஆய்வில் இலக்கண ஆசிரியர்களின் மதிநுட்பம் ...

இடையினம் என்பது வல்லினத்திற்கும் மெல்லினத்திற்கும் இடைப்பட்ட ஒன்றா? அல்லது உயிருக்கும் மெய்யுக்கும் இடையிலான ஒன்றா? எனக்கு ஒரு ஐயம் .. ஐயம்தான் !

பேச்சொலியியல் ( Phonetics) அடிப்படையில் பேச்சொலிகளை இரண்டாக வகைப்படுத்தலாம். (1) மூச்சுக்குழாயிலிருந்து வாயறைக்கு வரும் காற்றை எவ்விதத் தடையும் செய்யாமல், ஒலி பிறப்பித்தால் .... தடையற்ற ஒலியாக இருந்தால் ... அது உயிரொலி. (2) வாயறைக்கு வந்த காற்றைத் தடுத்துநிறுத்தி, ஒலி பிறப்பித்தால் ... தடையுள்ள ஒலியாக இருந்தால்... அது மெய்யொலி.

12 உயிரொலிகளும் தமிழில் தடையற்ற பேச்சொலிகள்...

வல்லினம், மெல்லினம் , இடையினம்உட்பட 18 மெய்யொலிகளும் தடையுடன் பிறக்கிற பேச்சொலிகள் ஆகும். இவற்றில் க் -ங் , ச்-ஞ், ட்-ண், த்-ந், ப்-ம், ற்-ன் ஆகியவை இன ஒலி ( homorganic phones) இணைகள். வல்லின ''க்'' பிறக்கிற இடத்தில்தான் ... பின்னண்ணத்தைப் பின்னாக்கானது தொடும் இடத்தில்தான் ... இது பிறக்கிறது. மெல்லின ''ங்'' -உம் இதே இடத்தில்தான் பிறக்கிறது. இரண்டுமே தடையொலிகள்தான். பிறப்பிடமும் (Position of Articulation) ஒன்றுதான். ஒரே வேறுபாடு... வல்லின ''க்'' வாயின்வழியே வெளிவருகிறது. மெல்லின ''ங்'' மூக்குவழியே வருகிறது. அத்தோடு, மெல்லினங்களுக்கான காற்று தொண்டையில் குரல்வளைநாண்களை அதிரவைத்துக்கொண்டு வெளிவரும். இதுபோன்றதுதான், மேற்குறிப்பிட்ட பிற இன ஒலி இணைகளும்! ஆனால் இடையின ஒலிகள் .... இவை வாயறையில் தடையின்றியும் வெளிவரவில்லை. அதேவேளை முழுத்தடையோடும் வெளிவரவில்லை. அதிகமான உயிரொலித்தன்மையும் இருக்கிறது... கொஞ்சம் மெய்யொலித் தன்மையும் இருக்கிறது. இவற்றை APPROXIMANTS என்று அழைப்பார்கள். இவற்றை உயிரொலிகளோடு வைத்துவிடலாம். ஆனால் இலக்கண ஆசிரியர்கள் அவ்வாறு செய்யவில்லை. ஏன் என்பதுதான் எனது ஐயம்!

பேச்சொலிகள் நேரடியாக பொருள்தரும் உருபனாக அல்லது சொல்லாக அமைவதில்லை. மொழியசைகளாக ( Linguistic Syllables) அமைந்து, பின்னர்தான் உருபனாக அமைகிறது. அசையில் மூன்று உறுப்புகள்.... (1) அசையின் தொடக்கம் (ONSET) (2) உச்சி அல்லது சிகரம் (PEAK) (3) ஒடுக்கம் அல்லது இறுதி (CODA). இவற்றில் உச்சி அல்லது சிகரமாக எல்லா மொழிகளிலும் அமைவது ( ஆங்கிலத்தில் சிறிது வேறுபாடு உண்டு) உயிரொலிகளே. தொடக்கமாகவும் ஒடுக்கமாகவும் அமைவது மெய்யொலிகள். ஒரு அசை தொடக்கம் அல்லது ஒடுக்கம் இல்லாமல் அமையலாம். ஆனால் உச்சி அல்லது சிகரம் இல்லாமல் அமையாது. 12 உயிரொலிகளும் தனித்தனி அசைகளே! எனவே மெய்கள் இல்லாமல் அவற்றைத் தனியே உச்சரிக்கமுடிகிறது. ஆனால் மெய்களோ உயிர் என்ற உச்சியுடைய அசையில்மட்டுமே வரமுடியும். அதாவது உயிரின்றி மெய்கள் தனித்து வரமுடியாது. ஒவ்வொரு உயிர்மெய் எழுத்தும் ( மெய் + உயிர் .... க்+அ = க) ஒரு தனி அசை.

இடையின ஒலிகள் அதிகமான உயிரொலித்தன்மை ( SONARANCE) உடையதாக இருந்தாலும், அவை தமிழில் அசையின் உச்சியாக அமைவதில்லை. உச்சிகளாக அமைந்தால்தான் ''உயிர்'' என்ற முழுத்தகுதி கிடைக்கும். இல்லையென்றால், ''மெய்'' என்ற தகுதிதான் கிடைக்கும். எனவேதான் இலக்கண ஆசிரியர்கள் இடையின ஒலிகளைத் தமிழில் மெய்களோடு சேர்த்துக் கூறியுள்ளதாகக் கூறலாமா?

பேச்சொலியியல் அடிப்படையில், தடையில்லா ஒலிகளை VOCOID என்றும் தடையொலிகளை CONTOIDS என்றும் கூறுவார்கள். பின்னர் எந்த ஒலிகள் அசைகளின் உச்சிகளாக அமைகின்றனவோ அவற்றை VOWELS என்றும் அவ்வாறு அமையாமல் அசைகளின் தொடக்கம் அல்லது இறுதியில் அமைகின்ற ஒலிகளை CONSONANTS என்றும் கூறுவார்கள் முதல் வகைப்பாடானது பேச்சொலித்தன்மையில் அமைவதாகும். இரண்டாவது வகைப்பாடு அசைக்கூறுகளின் அடிப்படையில் அமைவதாகும். பொதுவாக VOCOIDS அசைகளின் உச்சிகளாக அமையும். CONTOIDS அசைகளின் தொடக்கம் அல்லது இறுதியாக அமையும். ஆனால் சில மொழிகளில் CONTOIDS அசையின் உச்சிகளாக அமையலாம். ஆங்கிலத்தில் bottle என்ற ஈரசைச்சொல்லில் இரண்டாவது அசையில் " l " உச்சியாக அமைகிறது. button என்பதில் இரண்டாவது அசையில் " n " உச்சியாக அமைகிறது. ஆனால் தமிழில் இவ்வாறு கிடையாது. மாறாக, VOCOIDS தன்மையுடைய இடையின ஒலிகள் அசைகளின் உச்சிகளாக அமைவதில்லை. எனவே அசைகளின் தொடக்கமாகவும் இறுதியாகவும் மட்டுமே அமைகின்றன. எனவே, அவற்றை இலக்கண ஆசிரியர்கள் உயிர்களோடு ( VOWELS) சேர்க்காமல், மெய்களோடு ( CONSONANTS) சேர்த்தார்கள் என்று கூறலாம். எனவே இடையின ஒலிகளின் ஒலிப்புத்தன்மையில் உயிரொலித்தன்மை அதிகமாகயிருந்தாலும், அசைகளின் உச்சிகளாக ஆகும் தகுதி இல்லாததால், அவை மெய்யொலிகளோடு வைக்கப்பட்டுள்ளன.

எனவே இடையின ஒலியன்களை ... எழுத்துகளை வல்லினங்களுக்கும் மெல்லினங்களுக்கும் இடைப்பட்டவை என்று இலக்கண ஆசிரியர்கள் கருதாமல், உயிர்களுக்கும் மெய்களுக்கும் இடைப்பட்டவை என்று கருதினார்கள் என்று கூறலாம் என்பது எனது கருத்து. இது முடிந்த முடிவல்ல. நாளை இந்த இடையின ஒலியன்களின் சிறப்பான ... மற்ற மெய்களுக்கு இல்லாத தனிப்பட்ட ... பண்புகளைப்பற்றிக் கூறலாமென நினைக்கிறேன். இந்த உரை மிகவும் நீண்டதற்கு மன்னிக்கவும்.

Read more »