சோசலிசப் புரட்சிகளின் பின்னடைவுகளும் ரசியா - உக்ரைன் போரும் ...

  சோசலிசப் புரட்சிகளின் பின்னடைவுகளும் ரசியா - உக்ரைன் போரும் ...

------------------------------------------------------------------------------------------------------------------------

பல ஆயிரக்கணக்கான ஆண்டுகளாகச் சுரண்டும் ஆளும் வர்க்கங்கள் - சுரண்டப்படும் ஆளப்படுகிற வர்க்கங்கள் என்ற வர்க்க அடிப்படையில் நீடித்துவந்த மனித சமுதாயம்... தனது வளர்ச்சிப்போக்கில் ... குறிப்பாக 19 ஆம் நூற்றாண்டில் ... முதலாளித்துவ சமுதாயமாக மாற்றத்தையும் வளர்ச்சியையும் பெற்றது. மனித சமுதாயத்தின் இந்தப் புறவயமான வளர்ச்சிகளை மிகத் தெளிவான, அறிவியல்பூர்வமான ஆய்வுமுறைகளைக்கொண்டு ஆய்வு செய்த காரல் மார்க்சும் பிரடரிக் எங்கல்சும் ... இந்த முதலாளித்துவ வளர்ச்சியானது தனக்கு அடுத்த கட்ட வளர்ச்சியாக சோசலிச சமுதாயமாக மாறுவது தவிர்க்க இயலாத ஒன்று என்று எடுத்துரைத்தனர். சோசலிசம் என்பது ''தங்கள் தலைகளில் உதித்த'' ஒரு கற்பனைச் சமுதாயம் இல்லை... மாறாக, புறவய வளர்ச்சியில் தவிர்க்க இயலாத ஒரு சமுதாய வளர்ச்சிக்கட்டம் என்பதை அரசியல் பொருளாதார அடிப்படையில் விளக்கினர். இந்தச் சோசலிசக் கட்டமைப்பு ஒரு கட்டத்தில் கம்யூனிச சமுதாயமாக வளர்ச்சியடையும் என்பதையும் விளக்கினர். ஆனால் இந்த வளர்ச்சி ஒரு நீண்ட கால இயக்கமாகவே அமையும் என்பதையும் அவர்கள் உணர்ந்திருந்தனர்.

சோசலிசக் கட்டமைப்புக்கான வளர்ச்சிக்கால கட்டத்தில் ஒரு முக்கியமான வரலாற்றுத் திருப்பம் ... அதுவரை பல்லாயிரக்கணக்கான ஆண்டுகளாக ஆளும் வர்க்கங்களாக நீடித்த சுரண்டும் வர்க்கங்கள் ஆளப்படும் வர்க்கங்களாக அமைகின்றன; பாட்டாளிவர்க்கத் தலைமையிலான உழைக்கும் வர்க்கங்கள் ஆளும் வர்க்கங்களாக அமைகின்றன; அவற்றின் கைகளிலேயே அரசு இயந்திரம் நீடிக்கும். அந்த அரசு இயந்திரத்தின் உதவிகொண்டு... சோசலிசப் பொருளாதார அமைப்பைக் கட்டுவதோடு.... தொடர்ந்து நீடிக்கிற பழைய சுரண்டும் வர்க்கங்களின் அரசியல் பொருளாதார ஆணிவேர்களை அகற்றும் ; இறுதியில் வர்க்கவேறுபாடற்ற மனித சமுதாயம் தோன்றி நிலவும்.

இந்த மாற்றங்கள் எல்லாம், வளர்ச்சிகளெல்லாம் தனிமனிதர் கற்பனைகள் இல்லை; மாறாக, சமுதாயத்தின் புறவய வளர்ச்சிவிதிகள் என்பதைப் பொதுவுடமை இயக்கத் தலைவர்கள் தெளிவாக உணர்ந்திருந்தார்கள்.

ஆனால் இந்தச் சோசலிச சமுதாயமானது தனது முழுவளர்ச்சியை .. கம்யூனிச சமுதாயத்தை நோக்கிய வளர்ச்சியை ... குறுகிய காலத்தில் பெற்றுவிடமுடியாது. பல்லாயிரக்கணக்கான ஆண்டுகளாக நீடித்த சுரண்டும் - சுரண்டப்படும் வர்க்க சமுதாயத்தை ஒரு சில ஆண்டுகளில் ... குறுகிய காலகட்டத்தில் ... முழுமையாகத் தகர்த்துவிடமுடியாது. அவை நீடிப்பதற்கான பொருளாதார, அரசியல், பண்பாட்டுக் கூறுகள் அனைத்தும் வேரோடு பிடுங்கப்பட்டு எறியப்படும்வரை... அவை மீண்டும் தற்காலிகமாக ஆளும் வர்க்கங்களாக மாறுவதற்கான வாய்ப்புக்கள் உண்டு என்பதையும் கம்யூனிசத் தலைவர்கள் உணர்ந்தே இருந்தனர். எனவேதான் பாட்டாளி வர்க்கங்கள் ஆளும் வர்க்கங்களாக இருந்தாலும்... சமுதாயத்தின் அனைத்துத் தளங்களிலும்... கம்யூனிஸ்ட் கட்சியின் உள்ளுக்குள்ளும்... பழைய, ஆட்சியை இழந்த வர்க்கங்கள் தங்களது நேரடி நடவடிக்கைகளின்மூலம், கருத்து, பண்பாட்டு ஆதிக்கத்தின்மூலமும் ... தாங்கள் இழந்த ஆட்சியைக் கைப்பற்றக் கடுமையாகப் போராடும். அதாவது வர்க்கப்போராட்டங்கள் நீடிக்கும். இந்தப் போராட்டத்தில் கம்யூனிஸ்ட் கட்சிகள் எந்த அளவுக்கு உறுதியாக முன்னேறுகிறார்களோ, அந்த அளவுக்குத்தான் பிற்போக்கு வர்க்கங்களின் சதிகளை முறியடிக்கமுடியும்.

இந்த அடிப்படையில் தோழர் லெனின் , தோழர் ஸ்டாலின் போன்றோர் 15 நாடுகளை உள்ளடக்கிய சோவியத் சோசலிசக் குடியரசை நிறுவியபிறகும்.... பாட்டாளிவர்க்கத்தின் அரசை வலிமைப்படுத்தத் தேவையான நடவடிக்கைகளை மேற்கொண்டனர். அதுபோன்று சீனாவிலும் தோழர் மாசேதுங் மேற்கொண்டார்.

மற்றொரு பிரச்சினை... சோசலிச நாடுகளில் தொடர்ந்து நீடித்துவந்த சுரண்டும் வர்க்கங்கள் மட்டுமல்லாமல், வெளியே நீடித்த அமெரிக்க, இங்கிலாந்து, பிரான்ஸ் போன்ற ஏகாதிபத்தியங்களும் சோசலிச அரசுகளை வீழ்த்த பல வகைகளில் முயன்றன.

குறிப்பாக, ரசியாவில் தோழர் ஸ்டாலின் மறைவுக்குப்பின்னர் ஆட்சியிலும் கம்யூனிஸ்ட் கட்சியிலும் தன்னை இருத்திக்கொண்ட குருசேவ்... நடைமுறையில் உள்நாட்டில் சோசலிசத்தைப் பலவீனப்படுத்தவும், வெளியே பிற ஏகாதிபத்திய நாடுகளுடன் கூட்டு சேரவும் தீவிரமாக ஈடுப்பட்டார். அவருக்குப்பின்னர், பிரஸ்நேவ், கோர்பாச்சோ ஆகியோர் அவரது வழியைப் பின்பற்றினர். இவர்களின் இந்த நடவடிக்கைகளுக்கு அமெரிக்க ஏகாதிபத்தியம் முழுமையாக உதவியது. குறிப்பாக, 1990 -ஆம் ஆண்டுகளில் அமெரிக்காவின் புஸ், அவரைத்தொடர்ந்து ரீகன் பலவகைகளில் மேற்குறிப்பிட்ட திருத்தல்வாதத் தலைவர்களுக்கு அனைத்து உதவிகளையும் வழங்கினர். கிழக்கு ஜெர்மனியில் நீடித்த சோசலிச அரசைக் கவிழ்த்து, ஏகாதிபத்திய மேற்கு ஜெர்மனிய அரசுடன் இணைத்து, ஒன்றுபட்ட ஜெர்மன் ஏகாதிபத்தியத்தை 1990-இல் நிறுவியது. அதையொட்டி, கோர்போச்சோவின் முதலாளித்து வளர்ச்சிப்பாதையை முழுமையாக ஆதரித்து, 1991- டிசம்பர் 26 ஆம் ஆண்டு.... கம்யூனிசக் கொடி இறக்கப்பட்டு... 15 நாடுகளைக்கொண்ட சோவியத் குடியரசைத் தனித்தனியே பிரிந்துசெல்வதற்கு அமெரிக்க ரீகன் அரசு உதவியது.

அதுபோன்று சீனாவில் மாசேதுங் மறைவுக்குப்பின்னர், சோசலிச அரசும் ஒரு ஏகாதிபத்திய அரசாக மாறியது. இவ்வாறு உலக அளவில் சோசலிச முகாம் தற்காலிகப் பின்னடைவைக் கண்டது. சோசலிச நாடுகள் - குறிப்பாக ரசியாவும், சீனாவும் ஏகாதிபத்திய அரசுகளாக மாறியபிறகு... ஏகாதிபத்தியத்திற்கே உரிய பிற்போக்குத் தன்மையால் ... பிற நாடுகளைப் பங்குபோட... தங்களுக்குள்ளும் பிற ஏகாதிபத்திய நாடுகளுடனும் போர்களை - நேரடியாகவும் மறைமுகமாகவும் தொடுத்து வருகின்றன.

இந்த நோக்கில் .. தற்போதைய ரசியா - உக்ரைன் போரைப் பார்க்கவேண்டும். உக்ரைன் ரசியா ஏகாதிபத்தியத்தோடு நிற்பதா, அல்லது அமெரிக்கா தலைமையிலான ஏகாதிபத்திய முகாமோடு நிற்பதா? இதுதான் தற்போதைய பிரச்சினை.

சோசலிச சோவியத் உடைபட்டுச் சிதற ஒரு முக்கியக் காரணியாக இருந்த அமெரிக்கா முகாம் - ரசியா, உக்ரைன் என்று பிளவுபடக் காரணமாக இருந்த அமெரிக்க ஏகாதிபத்திய முகாம்... தற்போது உக்ரைனைத் தனது ஆளாக மாற்றிக்கொண்டு, ரசியா ஏகாதிபத்தியத்திற்கு எதிரான தனது செல்வாக்கை வளர்த்துக்கொள்ள முயல்கிறது. உக்ரைன் அரசில் தற்போதைய அதிபருக்கு முன்னால் இருந்த அதிபர்கள் ரசிய ஆதரவாளர்களாக இருந்தார்கள். இப்போது இருப்பவர் அமெரிக்க ஆதரவாளராக இருக்கிறார். சோவியத் சோசலிச அரசை 15 நாடுகளாகப் பிரித்து, சோவியத் குடியரசு நாடுகளில் புரட்சியாளர்களின் ஒன்றுபட்ட போராட்டங்களைத் தடுத்து நிறுத்தும் நடவடிக்கையில் ஈடுபட்ட அமெரிக்க ஏகாதிபத்தியம்... தற்போது ரசியாவுக்கும் உக்ரைனுக்கும் இடையில் போரை ரசித்துக்கொண்டிருக்கிறது.

உக்ரைன் ஏகாதிபத்திய ஆட்சியாளர்களுக்கு எதிராக அங்குள்ள பாட்டாளி வர்க்கம் போராடி... சோசலிச அரசை மீண்டும் நிறுவுவதே சரியான போராட்டம். ஆனால் அதை அங்குள்ள மக்களே மேற்கொள்ள வேண்டும். அதற்கு மாறாக, உக்ரைன்மீது தன் ஆதிக்கத்தை நிறுவிக்கொள்ள ரசியா போர் தொடுத்துள்ளது ஏகாதிபத்திய விரிவாக்கமே!

எனவேதான்... நாம் இந்தப் போரில் ரசியாவின் நடவடிக்கைகளை எதிர்க்கவேண்டியுள்ளது.

உக்ரைன் ஆட்சியாளர்களுக்கு எதிரான அந்த நாட்டு மக்களின் போராட்டங்களை .. புரட்சியை... ஆதரிப்பது முற்போக்காளர்களின் கடமை. ஆனால் உக்ரைன் ஆட்சியாளர்களைத் தங்களது முகாம்களில் இணைத்துக்கொள்ளப் போராடும், ரசியா, அமெரிக்கா முயற்சிகளை ஏற்கமுடியாது!

ஆனால் ஊர் பிளவுபட்டால் ... கூத்தாடிக்குக் கொண்டாட்டம் என்பதுபோல... சோவியத் சோசலிசக் குடியரசைப் பலவீனப்படுத்தி.... சிதறயடித்து... இன்று ஒரு கட்டத்தில் சோசலிச நாடுகளாக இருந்த ரசியாவுக்கும் உக்ரைனுக்கும் இடையிலான போர் நடப்பதை ஏகாதிபத்திய முகாம்கள் ரசித்துக்- கொண்டிருக்கின்றன. ஆனால் உண்மையான முற்போக்காளர்கள் ... புரட்சியாளர்கள்... வேதனைப்- படுகிறார்கள்! தற்காலிகப் பின்னடைவுகளுக்கு உட்பட்டுள்ள ரசியா, உக்ரைன், ஜெர்மனி போன்ற நாடுகளில் பாட்டாளி வர்க்கங்கள் மீண்டும் ஆளும் வர்க்கங்களாக மாறி.... உலக சமூக அமைப்பை... அடுத்த கட்ட சோசலிச வளர்ச்சிக்குக் கொண்டு செல்லவேண்டும் என்று நினைக்கிறார்கள்! உறுதியாக இந்த முயற்சி வெற்றிபெறும். ஆனால் ஒரு சில ஆண்டுகளில் ... குறுகிய காலகட்டத்தில் .. நடைபெற்றுவிடும் என்று நினைத்துவிடக்கூடாது. இறுதி வெற்றி சோசலிசத்திற்கு என்றாலும்.... இதற்கு நீண்ட காலம் தேவைப்படும் என்பதையும் மனதில் கொள்ளவேண்டும்!

சோசலிச நாடுகளில் ஏற்பட்டுள்ள மேற்குறிப்பிட்ட தற்காலிகப் பின்னடைவுகளை முன்னிலைப்படுத்தி.... சோசலிசம், கம்யூனிசம் தோல்வி அடைந்துவிட்டது என்று சோசலிச எதிர்ப்பாளர்கள் ... சுரண்டும் வர்க்கங்கள், ஏகாதிபத்திய முகாம்கள் ... மக்களைத் திட்டமிட்டு ஏமாற்ற முயல்கிறார்கள். ஆனால் புறவய வளர்ச்சி விதிகளின் அடிப்படையில் மனித குலம் சோசலிசத்தை.... கம்யூனிசத்தை ... நோக்கி முன்னேறுவதை எந்த சக்தியாலும் தடுத்துவிடமுடியாது. புவி ஈர்ப்பு விசை என்பது எந்த அளவு அறிவியல் அடிப்படையில் அமைந்த .. யாராலும் மறுக்கமுடியாத... மாற்றமுடியாத இயற்கைவிதியோ... அதுபோன்றதே மனித சமுதாயம் சோசலிசத்தை... கம்யூனிசத்தை நோக்கி உறுதியாகச் செல்லும் என்பதும் ஆகும்!

Read more »

மக்கள் ஆட்சி ... பாட்டாளி மக்கள் ஆட்சி ...

 மக்கள் ஆட்சி ... பாட்டாளி மக்கள் ஆட்சி ...

--------------------------------------------------------------------------(சமூக மாற்றத்தில் நம்பிக்கை உள்ள அன்பர்கள் நேரம் கிடைக்கும்போது இதைப் படிக்கலாம்!)

திரு செயபாண்டியன் கோட்டாளம்:

// மக்களாட்சிக்கும் பாட்டாளிமக்களாட்சிக்கும் என்ன வேறுபாடு? பாட்டாளிமக்கள் மக்களல்லரோ?//

ந. தெய்வ சுந்தரம்:

மனித சமுதாயத்தின் வளர்ச்சியின் ஒரு உயர்ந்த கட்டம் முதலாளித்துவ சமுதாயம். அச்சமுதாயத்தில் முதலாளி வர்க்கம் ஒருபுறமும் பாட்டாளி - தொழிலாளி வர்க்கம் மறுபுறமும் நிற்கின்றன.

முதலாளித்துவ வர்க்கத்தின் தலைமையில் பிற சுரண்டும் வர்க்கங்களும் - நிலப்பிரபுத்துவ சக்திகளும் - ஒரு புறம் திரண்டு நிற்கின்றன. இந்தப் பிற சுரண்டும் வர்க்கங்கள் முதலாளித்துவம் ( உற்பத்தி சக்திகள்- productive forces - முழுமையாகச் சமூகமயப் - படுத்தப்படப் பட socilaised productive forces - socialised production) வளர வளர.... தங்கள் அழிவை நோக்கிச் சென்று கொண்டிருக்கும் ... அழிந்துகொண்டிருக்கும் வர்க்கங்களே. ஆனால் அவற்றின் தற்காலிக நீடிப்பானது ... பாதுகாப்பானது ... வளர்ந்த சுரண்டும் வர்க்கமான முதலாளித்துவ வர்க்கத்தைச் சார்ந்தே உள்ளது. மேலும் முதலாளித்துவ வர்க்கத்தின் நோக்கமும் இந்தப் பிற சுரண்டும் வர்க்கங்களை இல்லாமல் ஆக்குவதுதான்! ஆனால் அதுவரை உழைக்கும் வர்க்கங்களை எதிர்த்துப் போராடுவதற்காகத் தற்காலிக ஒற்றுமையை அவற்றுடன் பேணுகின்றது. தனது நலன்களைப் பாதுகாத்துக்கொளவதோடு, பிற சுரண்டும் வர்க்கங்களின் நலன்களையும் - தனியுடமைகளையும் - பாதுகாக்கும்!

அதுபோல, முதலாளித்துவ சமுதாயத்தின் வளர்ச்சியில் பாட்டாளி வர்க்கமானது தங்களது உழைப்புச்சக்தியை முதலாளிகளுக்கு விற்பதைத்தவிர வேறுவழியொன்றும் இல்லாத.... இழப்பதற்கு வேறு எந்தவொரு உடமையும் இல்லாத... வர்க்கமாக அமைகிறது. இந்த வர்க்கத்தின் ஒட்டுமொத்த நலனே ... உழைப்புச்சக்தி சமுகமயப்படுத்தப்பட்டதுபோல, அந்த உழைப்பின் விளைபொருள்களை ... பயன்களை... சமூகமயப்படுத்தப்படுதலில்தான் உள்ளது. எந்தவிதத் தனியுடமையும் இல்லாமல் உள்ள ஒரு சமுதாயத்தை உருவாக்குவதுதான் அதன் நோக்கமாக இருக்கமுடியும்! அப்போதுதான் ஒட்டுமொத்த சமுதாயத்தின் உற்பத்தி வளர்ச்சியும் அடுத்த உயர்நிலைக்குச் செல்லும். இதற்கான போராட்டத்தில் ஈடுபட்டு வெற்றிபெறுவதுதான் இந்த வர்க்கத்தின் நோக்கமாகும். எனவேதான் இந்த வர்க்கம் சமுதாயத்தின் முற்போக்கு வர்க்கமாகப் பார்க்கப்படுகிறது!

அதே வேளையில் பிற சுரண்டப்படும், ஒடுக்கப்படும் வர்க்கங்களும், ஒடுக்கப்படும் தேசிய இனங்களும் அங்கு நீடிக்கும். இவையும் சோசலிச சமுதாயத்தின் வளர்ச்சியில் ஒரு கட்டத்தில் இல்லாமல் போகும். இவற்றின் இறுதி நலன்களும் பாட்டாளி வர்க்கத்தின் போராட்டத்தின் வெற்றியில்தான் அடங்கியுள்ளன. ஆனால் இந்த வர்க்கங்கள் சிறு சிறு உடமைகளைக்கொண்ட வர்க்கங்களாகவும் இருக்கும்.

எனவே தனியுடமையை ஏற்றுக்கொள்ளும் வர்க்கங்களாக இருக்கும். தனியுடமைச் சிந்தனை உடையவையாக இருக்கும். எனவே சோசலிச கட்டமைப்பை ஒரு கட்டம்வரை ஏற்றுக்கொள்ளாமல்... ஆனால் அதேவேளையில் முதலாளித்து வர்க்கத்தின் தலைமையிலான சுரண்டும் வர்க்கங்களின் அரசு அகற்றப்படுவதிலும் ஆர்வம் கொள்ளும். சிறு சிறு தனியுடமைகளையும் ஆதரிக்கும். எனவே முதலாளித்துவ வர்க்கத்திற்கு எதிரான போராட்டத்தில் உறுதியாக இருக்காது. ஊசலாட்டம் இருக்கும்.

எனவே பாட்டாளி வர்க்கம் இந்தப் பிற சுரண்டப்படும் சிறு சிறு வர்க்கங்களுக்குத் தலைமை அளிப்பதாக இருக்கவேண்டியுள்ளது. வர்க்கங்களையே இல்லாமல் ஆக்குவதில்தான் சோசலிச சமுதாயத்தின் வளர்ச்சி அடங்கியுள்ளது. முதலாளித்துவ அணியில் உள்ள அனைத்துச் சுரண்டும் வர்க்கங்களுக்கும் எதிராக நிற்கிற .... பாட்டாளிவர்க்கம் உட்பட பிற சுரண்டப்படும் வர்க்கங்கள், இனங்களைத்தான் பொதுவாக ''உழைக்கும் மக்கள் '' என்று அழைக்கிறோம். இந்த எல்லா சுரண்டப்படும் வர்க்கங்களின் ஆட்சியைப் பொதுவாகப் பாட்டாளி வரக்க்த்தின் தலைமையிலான 'மக்களாட்சி'' ''ஜனநாயக ஆட்சி''என்றும், அதன் அடுத்த கட்ட வளர்ச்சியை முழுமையான பாட்டாளிவர்க்க ஆட்சி என்றும் அழைக்கலாம்.

அனைத்துச் சுரண்டப்படும் வர்க்கங்களின் நலன்களையும் பிரதிபலிக்கும் பாட்டாளி வர்க்கத்தின் தலைமையில் மக்களாட்சி இருந்தால்தான் , அடுத்த கட்ட சோசலிச வளர்ச்சியைச் சமுதாயம் எட்டும். அது பாட்டாளிவர்க்கத்தின் முழுமையான ஆட்சியாக அமையும். அதற்கு அடுத்த கட்டம்.... வர்க்கங்களே இல்லாத ஒன்றாக ,, கம்யூனிச சமுதாயமாக மனித சமுதாயம் மாறும். இது நமது சிந்தனையைச் சார்ந்த ஒரு கற்பனை இல்லை. பிற அறிவியல்போன்று... முறையான சமூக ஆய்வில் காரல் மார்க்ஸும் பிரடரிக் எங்கல்சும் முன்வைத்த சமூக அறிவியல் ஆகும்.

வர்க்கமற்ற ஒரு சமுதாயத்தை நிறுவுவதில்தான் ஒட்டுமொத்த மக்களின் நலன்கள் அடங்கியுள்ளது. அப்போதுதான் வர்க்கமற்ற - சுரண்டும் வர்க்கங்கள், சுரண்டப்படும் வர்க்கங்கள் என்ற வேறுபாடு இல்லாத - சமுதாயம் மலரும். ஆனால் அந்த வளர்ச்சியை எட்டுவதற்கு வர்க்கப்போராட்டங்கள் தேவைப்படுகின்றன. அதில் ஒரு கட்டம், பாட்டாளி வர்க்கத்தின் தலைமையிலான அனைத்து உழைக்கும் மக்களையும் கொண்ட அரசு. அதற்கு அடுத்த கட்டம் , பாட்டாளி வர்க்கத்தை மட்டும்கொண்ட சோசலிச அரசு.

இந்த அரசில் சமுதாயத்தில் ஆட்சியிழந்த முதலாளித்து வர்க்கம் பல முனைகளில் பாட்டாளி வர்க்க ஆட்சியை வீழ்த்தப் போராடும். சோசலிச அரசுகளை உள்ளிருந்தும் வெளியிருந்தும் ஆட்சியிழந்த முதலாளித்து வர்க்கம், ஏகாதிபத்திங்கள் போராடும். ஆட்சியை... அரசை.... கைப்பற்றும்! பாட்டாளிவர்க்கம் தற்காலிகப் பின்னடவுகளைச் சந்திக்கும்! (சோவியத் ரசியாவிலும், சீனாவிலும், ஜெர்மனியிலும் தற்போது நடைபெற்றுள்ளது இதுதான்!) ஆனால் இறுதியில் அது வீழ்த்தப்படும். அதற்கும் அடுத்த கட்டமே, வர்க்கங்களே இல்லாத மக்கள் அரசு. இதுவே சமுதாய வளர்ச்சியின் உயர்ந்த கட்டமான 'மக்களாட்சி'. இது இன்றைக்கு ஒரு கற்பனையாகச் சிலருக்குத் தெரியலாம். ஆனால் இதுவே சமுதாய வளர்ச்சிபற்றிய அறிவியல் அடிப்படையிலான ஒரு உண்மை!

சில நூற்றாண்டுகளுக்குமுன்னர்... சந்திரனுக்கும் செவ்வாய்க்கும் போகமுடியும் என்றால், யாராவது நம்பியிருப்பார்களா? ஆனால் இன்று? ஒரு சில விநாடியில் உலகம் முழுவதும் இணையம் வழியாகத் தொடர்புகொள்ளமுடியும் என்று அன்று நினைத்திருப்பார்களா? ஒரு சில மணிநேரத்தில் அமெரிக்காவுக்கும் லண்டனுக்கும் பறக்கமுடியும் என்று எதிர்பார்த்து இருக்கமுடியுமா?

அதுபோன்றதுதான் நான் கூறும் சமூக அறிவியல் அடிப்படையிலான சமூக வளர்ச்சி! ஆனால் இந்த மாற்றங்கள் எல்லாம் என்னுடைய வாழ்க்கையிலேயே வந்துவிடும் என்று நான் நினைத்தால், அது தவறானது. பல நூற்றாண்டுகள் ஆகலாம். கற்கால மனித சமுதாயம் இன்றைய அறிவியல் சமுதாயமாக மாறி வர எத்தனை நூற்றாண்டுகள் ஆகியுள்ளன என்பதைச் சிந்தித்துப் பார்த்தால், இந்த உண்மை விளங்கும்! அறிவியலுக்கு அப்பாற்பட்ட எத்தனையோ ''நம்பிக்கைகளை'' இன்னும் நம்பிக்கொண்டிருக்கிற நாம்.... அறிவியல் அடிப்படையிலான இந்த சமூக வளர்ச்சி இயலை ...புறவயமான சமூக வளர்ச்சி விதிகளை ஏன் ''இயலாத'' ஒன்று என்று நினைக்கவேண்டும்?

Read more »

சமூக அறிவியலுக்கும் பிற இயற்கை அறிவியல்களுக்கும் இடையில் உள்ள வேறுபாடு....

 சமூக அறிவியலுக்கும் பிற இயற்கை அறிவியல்களுக்கும் இடையில் உள்ள வேறுபாடு....

---------------------------------------------------------------------------------------------------------------------------

இயற்பியல், வேதியியல், உயிரியல் போன்ற இயற்கை அறிவியல்களின் பயன்பாடுகளை முதலாளித்துவ சக்திகள் தங்கள் நலன்களுக்காகப் பயன்படுத்திக் கொள்ளலாம். ஆனால் இந்த அறிவியல்களின் கண்டுபிடிப்புகள் வர்க்க நலன்களைக் கொண்டதாக இருக்காது. அதாவது வர்க்கப் பண்புகள் இருக்காது. இயற்கைவிதிகளின் கண்டுபிடிப்புகள் எல்லாம் அனைவருக்கும் - வர்க்கங்களுக்கு அப்பாற்பட்டு- பயன்படும்.

ஆனால் சமூக அறிவியல், இலக்கியம் ஆகியவற்றில் - தத்துவம், அரசியல் , பொருளாதாரம், சமூகவியல், மானிடவியல், வரலாறு, இலக்கியத் திறனாய்வு போன்றவற்றில் மிகக் கவனமாக இருக்கவேண்டும். உண்மையான - புறவயமான சமூகவியல் உண்மைகளைச் சுரண்டும் வர்க்கங்கள் மறைக்கமுயலும். வரலாறு, பொருளாதாரம் என்ற போர்வையில் அவை தங்களுக்குச் சாதகமான ''கருத்துக்களை'' முன்வைத்து, உண்மைகளை மறைத்து, உழைக்கும் வர்க்கங்களை ஏமாற்றமுயலும். தங்களது கல்விமுறையில் இதையே அவை செய்யும். தங்களது ''கண்டுபிடிப்புக்களை'' ''கருத்துக்களை'' வர்க்கங்களுக்கு அப்பாற்பட்ட - அனைவருக்கும் பொதுவான ஒன்றாகக் காட்டமுயலும். இதற்குக் காரணம்... புறவயமான சமூகவியல் விதிகள் அந்த வர்க்கங்களின் நலன்களுக்கு எதிராக அமைவதுதான் ஆகும். இதை வெளிப்படுத்திய காட்டியவர்கள்தான் மார்க்சும் எங்கல்சும், லெனினும், ஸ்டாலினும், மாசேதுங்கும் ஆவர். இவர்கள் அனைவரும் உழைக்கும் வர்க்கங்களின் நலன்களுக்காகச் சமூக ஆய்வில் ஈடுபட்ட காரணத்தால், சமூகவியலின் உண்மைகளை - புறவய விதிகளை- வெளிக்கொணர்வதில் இவர்களுக்கு அச்சம் கிடையாது.

Read more »

இடைத்தட்டு வர்க்கச் சிந்தனையாளர்களின் மார்க்சிய எதிர்ப்பு.....

 இடைத்தட்டு வர்க்கச் சிந்தனையாளர்களின் மார்க்சிய எதிர்ப்பு.....

------------------------------------------------------------------------------------------------------------------------

இயற்கை அறிவியல்களையும் சமயத் தத்துவங்களையும் முதலாளித்துவ சமூகக் கருத்துக்களையும் ஏற்றுக்கொள்கிற நண்பர்கள் சிலர்.... சமூகம்பற்றிய அறிவியலை - குறிப்பாக மார்க்ஸ். எங்கல்ஸ், லெனின், ஸ்டாலின், மாசேதுங் போன்றோரின் சமூக அறிவியலை - ஏற்றுக்கொள்ளமாட்டார்கள். இது எதிர்பார்க்கப்படுகின்ற ஒன்றுதான்.

ஆளும் சுரண்டும் வர்க்கங்கள் ஏற்றுக்கொள்ள- மாட்டார்கள் என்பதில் ஐயம் இல்லை. ஆனால் இடைத்தட்டு வர்க்கங்களைச் சேர்ந்த சிலர் - குறிப்பாக மூளை உழைப்பைச் சார்ந்த இடைத்தட்டு வர்க்கப் பிரிவினர் , அறிவியலார்கள், ஆய்வாளர்கள் சிலர் - ஏற்றுக்கொள்ள மறுக்கும்போது, சற்று வேதனையாக இருக்கும். அவர்களின் மறுப்புக்குக் காரணம்... அவர்கள் இல்லை... அவர்களின் மனதில் சுரண்டும் வர்க்கங்களின் நலன்களைப் பாதுகாக்கும் சிந்தனைமுறை, தத்துவம், சமூகவியல் போன்றவை ஏற்றப்பட்டுள்ளன. அவர்களது வாழ்க்கைமுறைகளிலும் மனதிலும் நீடிக்கிற - மறைமுகமாகத் திணிக்கப்பட்டுள்ள - முதலாளித்துவச் சமுதாயக் கல்வியும் மற்றவையும்தான் காரணம்!

மேலும் சிறு உடமைகள் இவர்களுக்கு இருக்கலாம். நல்ல ஊதியம், மற்ற வசதிகளை முதலாளித்துவச் சமுதாயம் அளித்திருக்கலாம். இவையெல்லாம் சோசலிச சமுதாயத்தில் ''பறிக்கப்பட்டுவிடும்'' என்ற ஒரு பொய்ம்மை அவர்களது பார்வையிலும் சிந்தனையிலும் மறைமுகமாகத் திணிக்கப்- பட்டிருக்கின்றன. சோசலிசம் தனிமனித உரிமைகளுக்கு எதிரானது, சர்வாதிகாரப் போக்கு உஉடையது என்று கூறப்பட்டுள்ளது. இவர்களும் முதலாளித்துவப் பணக்காரர்களும் ஒன்றுதான் என்று நம்ப வைக்கப்பட்டிருக்கின்றனர். ஆனால் உண்மையில் இவர்களுக்கு இந்த முதலாளித்துவச் சமுதாயத்தில் பெறுகிற நலன்களைவிட, சோசலிச சமுதாயத்தில் கிடைக்கும் நலன்களே அதிகமாக இருக்கும்; ஒட்டுமொத்தி சமூக நலன்களின் அடிப்படையில் தனிமனித உரிமைகளும் பாதுகாக்கப்படும் என்பது மறைக்கப்படுகிறது.

ஆனால் இவ்வாறு அவர்களை மூளைச் சலவை செய்திருக்கும் முதலாளித்துவ வர்க்கம்... சோசலிசத்தையும் புறவயமான சமூக அறிவியலையும் ''கம்யூனிசம் திணித்து, மூளைச் சலவை செய்யும்'' என்ற ஒரு பொய்ம்மையைப் பரப்பிவைத்திருக்கிறது. மேலும் அது இவர்கள் மூலமே கீழ்த்தட்டு வர்க்க மக்களையும் மூளைச் சலவை செய்யப் பயன்படுத்தும். உண்மையில் இந்த இடைத்தட்டு வர்க்கங்கள் ''தாங்களும் டாடாவாகவும், பிர்லாவாகவும், அம்பானியாகவும்'' என்ற ஒரு கற்பனையில் இருப்பார்கள். ஆனால் நடைமுறையில் இவர்கள் மேலும் மேலும் கீழ்த்தட்டு வர்க்கங்களாகவே மாறிக்கொண்டிருப்பார்கள். அதற்குக் காரணங்களாக '' இவர்களது முற்பிறவி பாவம்'' ''கடவுள் இன்னும் கருணை காட்டவில்லை'' ''ராசி பலன்கள் சரியில்லை'' ''உழைப்பு போதாது'' போன்றவை முன்வைக்கப்படும்.

ஆனால் இவர்கள் உண்மையிலேயே உழைக்கும் வர்க்க மக்களுக்கு எதிரானவர்கள் இல்லை. இவர்களது மனதில் விதைக்கப்பட்டுள்ள பலவகை ''பொய்ம்மைகளை'' உறுதியாக அழிக்கமுடியும். ஆனால் அதற்குக் காலமும் தேவை... பொறுமையும் தேவை!

எனவேதான் ... மார்க்சியம், கம்யூனிசம்பற்றி அவர்கள் அடிப்படையில்லாத பல்வேறு கருத்துக்களை கம்யூனிசத்திற்கு எதிராக முன்வைத்தாலும், அவர்களை எதிரிகளாக உழைக்கும் வர்க்க நலன்களுக்காகப் போராடுபவர்கள் பார்க்கக்கூடாது. இதுவே என் நிலைபாடு!

இயற்கை அறிவியலில் மிகச் சிறந்த ஜே டி பர்னால் (J D Barnal)), ஜோசப் நீடாம் (Joseph Needham) , கோசாம்பி (Kosambi)போன்றோர்கள்... பொருளாதாரத் துறையில் மிகப் பெரிய பேராசிரியர்களான பால் ஸ்வீசி (Pall M Sweezy), பாரன் (Baran), பெத்லேஹிம் (Bettelheim), மாரிஸ் டாப் (Maurice Dobb), லியோ ஹியூபர்மேன் (Leo Huberman), மேக்டாப் (Harry Magdoff) போன்றோர்கள் ,,, தத்துவம், இலக்கியத்துறையின் பேராசிரியர்கள் ஜார்ஸ் தாம்சன் (Geeorge Thomson), மேரிஸ் கார்ன்ஃபர்த் (Maurice Cornforth), தேபி பிரசாத் சட்டோபாத்யாயா (Debi Prasad Chattopadya), வரலாற்றுத்துறையின் பேராசிரியர்களான ரோமிலா தாப்பர் (Romila Thapper), இர்பான் ஹபீப் (Irfan Habib) , மொழியியல் துறை மேதை சோம் சாம்ஸ்கி (Noam Chomsky) ... பட்டியல் நீளும். இவர்கள் எல்லோரும் முதலாளித்துவக் கல்விமுறையில் படித்துவந்தவர்கள் என்றாலும்... மார்க்சியத்தின் புறவயமான சமூக அறிவியலை ஏற்றுக்கொண்டவர்கள்.

மேற்குறிப்பிட்ட பேராசிரியர்கள்போன்று.... கல்வி, ஆய்வு, பண்பாடு, தத்துவம், இயற்கை அறிவியல் போன்றவற்றில் ஈடுபட்டுள்ளவர்கள்... உழைக்கும் வர்க்கங்களுக்கான நிலைபாடுகளை எடுத்து... இயற்கை, சமூகம் பற்றிய பொய்ம்மைகளை எதிர்த்துப் போராடி... உண்மையான, புறவயமான சமூக அறிவியலை மற்றவர்களுக்கு எடுத்துச் செல்லவேண்டும். சமூக முன்னேற்றத்திற்கான பணிகளில் ஒரு சிறிதாவது நமது பங்கு இருக்கவேண்டும் என்று முடிவு எடுத்து, ஏதாவது ஒரு வகையில் சமூகத்திற்காக உழைக்கவேண்டும். அப்போதுதான் அவர்களது வாழ்க்கை ஒரு நிறைவான வாழ்க்கையாக அமையும்!

12வழக்கறிஞர் சு. கலைச்செல்வன், முத்தையா சுப்பிரமணியம் மற்றும் 10 பேர்

2 கருத்துகள்

3 பகிர்வுகள்

விரும்பு

கருத்துத் தெரிவி

பகிர்

Read more »

''தமிழாசிரியர்களின் குருட்டுத்தனமான விதிகள்'' ! - உண்மையா?

 ''தமிழாசிரியர்களின் குருட்டுத்தனமான விதிகள்'' ! - உண்மையா?

------------------------------------------------------------------------------------------------------------

சந்தி, புணர்ச்சிபற்றிய எனது கட்டுரை ஒன்றில் இரண்டாம் வேற்றுமை வெளிப்படையாக வருகிற ஒரு பெயர்ச்சொல்லையடுத்து (நிலைமொழி) வல்லின எழுத்தை முதலாகக்கொண்ட ஒரு பெயர்ச்சொல் அல்லது வினைச்சொல் அல்லது வேறு எந்த வகைச் சொல்(வருமொழி) வந்தாலும், நிலைமொழிக்கும் வருமொழிக்குமிடையில் (வருமொழியின் முதல் வல்லொற்று) மிகும். இதற்கு விதிவிலக்கே கிடையாது, கண்ணை மூடிக்கொண்டு, வல்லொற்றை இடலாம் என்று கூறியிருந்தேன்.

இதனைப்பற்றிய தனது மாறுபட்ட கருத்தைத் தமிழன்பர் திரு. முத்தையா சுப்பிரமணியம் அவர்கள் தனது பதிவில் குறிப்பிட்டிருந்தார். மிக நுட்பமாக ஒரு கருத்தை முன்வைத்தார். இரண்டாம் வேற்றுமையடுத்து வருகிற சொல் வினையாக- குறிப்பாக இரண்டாம் வேற்றுமை ஏற்கிற பெயர்ச்சொல்லின்மீது செயல்படுகிற வினைச்சொல்லாக - இருந்தால்மட்டுமே ஒற்று மிகும். ''திருக்குறளைத் திருவள்ளவர் எழுதினார்'' என்பதில் ''திருக்குறளை'' அடுத்து ''திருவள்ளுவர்'' என்ற பெயர்ச்சொல் வரும்போது, ஒற்று இடக்கூடாது; மாறாக, '' அவர் திருக்குறளைப் படித்தார்'' என்று வரும்போது, ஒற்று இடவேண்டும் என்ற ஒரு கருத்தை முன்வைத்து எழுதியிருந்தார். 2-ஆம் வேற்றுமை ஏற்று ஒரு பெயர்ச்சொல் வரும்போது, அந்தத் தொடரில் உறுதியாக ஒரு செயப்படுபொருள் ஏற்கும் வினைச்சொல் (செயப்படுபொருள் குன்றா வினை) வரவேண்டும் என்பது கட்டாயம். இல்லையென்றால் அந்தத் தொடர் முடிவுபெறாது. 'அவர் மணியை வந்தார்'' என்று கூறமுடியாது. ஏனென்றால், 'வா' என்பது செயப்படுபொருள் குன்றிய வினை. 2-ஆம் வேற்றுமைப் பெயர்ச்சொல் தனக்குரிய வினையுடன் அடுத்துவந்து புணரும்போதுதான் , ஒற்று மிகும் என்பது அவர் கருத்து. அதற்கான சில ஆதாரங்களையும் கொடுத்திருந்தார்.

நான் அதற்கு '' நல்லதொரு ஆய்வு. கருத்தில் கொள்கிறேன்'' என்று எழுதியிருந்தேன். பேராசிரியர் ச. அகத்தியலிங்கம், பேராசிரியர் பொற்கோ, பேராசிரியர் மருதூர் அரங்கராசன் ஆகியோர் எழுதியுள்ள ஆய்வுகளின் அடிப்படையில் எனது கருத்தை அமைத்திருந்தேன். இவர்கள் சொல்வது சரியா இல்லையா என்பதை மேலும் ஆராயலாம். அதில் தவறு இல்லை. தவறாக இருந்தால் திருத்திக்கொள்ள நான் எப்போதுமே அணியமாக இருக்கிறேன். அதில் எவ்வித வேறுபாடும் எனக்குக் கிடையாது. நானும் தொடர்ந்து ஆய்வுசெய்து விடை காணத் தயார்.

ஆனால் அந்தப் பதிவுத் தொடரில் நண்பர் செயபாண்டியன் கோட்டாளம் அவர்கள் பின்வருமாறு கூறியிருந்தார்.

//ஓ, இப்போது புரிகிறது. இந்த குருட்டுத்தனமான 'விதி'களை தமிழாசிரியர்கள் பின்பற்றுவது ஏன் என்பது எனக்கு இதுவரை புரியாத புதிராயிருந்தது.//.

தமிழாசிரியர்களும் மொழியியல் ஆய்வாளர்களும் ''குருட்டுத்தனமான விதிகளை'' முன்வைக்கிறார்கள் என்று இவ்வாறு பொத்தம்பொதுவாகக் கூறுவது சரியில்லை! பேரா. அகத்தியலிங்கம், பேரா. பொற்கோ, பேரா. மருதூர் அரங்கராசன் போன்றோர் தமிழ் இலக்கியம், தமிழ் இலக்கணம், மொழியியல் ஆகியவற்றில் முறையான ஆய்வுகளை மேற்கொண்டவர்கள். அவர்கள் ''குருட்டுத்தனமான விதிகளை'' ஒருபோதும் முன்வைத்தது இல்லை! ஆய்வு முடிவுகளில் வேறுபடலாம். அது வேறு!

ஆய்வாளர்களுக்கென்று ஒரு பண்பாடு உண்டு. இது உலக அளவிலான ஒரு பண்பாடு. ஒரு கருத்தை எவ்வாறு விவாதிக்கலாம், வேறுபடும்போது அந்த வேறுபாட்டை எவ்வாறு தெரிவிக்கலாம் என்பதற்கெல்லாம் ஒரு வரன்முறை உண்டு. நண்பர் செயபாண்டியன் கோட்டாளம் அவர்கள் மிகச் சிறந்த வேதியியல் ஆய்வாளர். அவரிடமிருந்து இதுபோன்ற தொடர்கள் வருவது வேதனையாக இருக்கிறது.

பொதுவாக, தமிழாசிரியர்கள் என்றால் சிலர் நினைப்பது '' அவர்கள் கிணற்றுத் தவளைகள்'' என்று. இது மிகத் தவறான கருத்து. இலக்கணத்தைமட்டுமல்ல, பலரின் உரைகளையும், இலக்கிய வழக்குக்களையும் உற்றுநோக்கித்தான் அவர்கள் கருத்து கூறுவார்கள். மேலும் இன்று பெரும்பான்மையான தமிழாசிரியர்கள் ( பேரா. ச. அகத்தியலிங்கம், பேரா. பொற்கோ, பேரா. மருதூரார், போன்றோரும் என்னைப் போன்றவர்களும் ) உலகந்தழுவிய மொழியியல் ஆய்வுகளையும் அடிப்படையாகக்கொண்டுதான் தமிழ் இலக்கணம்பற்றிக் கருத்து தெரிவிக்கிறார்கள்.

தமிழாசிரியர்கள் முன்வைக்கும் கருத்துக்களில் வேறுபடுங்கள்! அது வேறு! ஆனால் அவர்கள் ஆய்வு நெறிமுறை தெரியாதவர்கள் என்றும் ''குருட்டுத்தனமான விதிகளை'' முன்வைப்பவர்கள் என்றும் கூறாதீர்கள். அவ்வாறு கூறுவது பண்பாடுமிக்க ஆய்வு நெறிமுறை இல்லை!

சந்திபற்றிய எனது கருத்துக்கள்

--------------------------------------------

' தமிழ்ப் புணர்ச்சி விதிகள் மிகவும் வியக்கத்தக்க அளவில் கணிதப் பண்புகளைக் கொண்டுள்ளன. எனவே கணினிக்கேற்றவகையில் விதிகள் அடிப்படையில் நிரல்களை உருவாக்கமுடிகிறது' .... பொருள் மயக்கத்தைத் தவிர்க்கவும் வாசிக்கும்போது அல்லது பேசும்போது பேச்சொலி அலைகள் தொடர்ச்சியாகத் தடையின்றித் தொடரவுமே சந்தி பயன்படுகிறது. தமிழுக்கே உரிய சொல்லசை அமைப்பைத் தக்கவைக்கவும் பயன்படுகிறது.'

Read more »

மொழியியல் என்பது ஆங்கில இலக்கணமா?

 மொழியியல் என்பது ஆங்கில இலக்கணமா?

-----------------------------------------------------------------------------------------------------------

மொழியியலுக்கும் ஒரு குறிப்பிட்ட மொழியின் இலக்கணத்திற்கும் இடையில் உள்ள உறவுபற்றி நண்பர்கள் சிலருக்குக் குழப்பம் ஏற்படுவதை நான் பார்த்திருக்கிறேன். ''நான் மொழியியல் மாணவர்'' என்று கூறும்போது, ''அப்படியென்றால் தமிழ்மொழியியலா, அல்லது ஆங்கிலமொழியியலா?'' என்று நண்பர்கள் சிலர் கேட்பது உண்டு. ''இல்லை நண்பரே, மொழியியல் என்பது எந்தவொரு மனித இயற்கைமொழியையும் ஆராய்வதற்கான ஆய்வுமுறைகளை உள்ளடக்கிய ஒரு தனி அறிவியல் துறை'' என்று நான் கூறுவேன். ''அப்படியென்றால் தொல்காப்பியர் ஒரு மொழியியலாளரா அல்லது தமிழ் இலக்கண ஆசிரியரா?'' என்று ஒரு ஐயத்தை முன்வைப்பார்கள்.

''தொல்காப்பியர் ஒரு மொழியியலாளர்... அதேவேளையில் தமிழ் இலக்கண ஆசிரியர்'' என்பதே எனது பதிலாக இருக்கும். ''அதெப்படி இரண்டாகவும் ஒருவர் இருக்கமுடியும்?'' என்று கேட்பார்கள். ''தொல்காப்பியர் தமிழ்மொழியின் அமைப்பைக் கண்டறிவதற்குச் சில தெளிவான முறைகளை - புறவயமான ஆய்வுமுறைகளை- பின்பற்றியுள்ளார். அதுபோன்று தான் கண்டறிந்த தமிழ் இலக்கணத்தை ஒரு நூலாக முன்வைக்கும்போது, எந்த வரிசையில் எதைக் கூறவேண்டும் என்பதுபற்றியும் ஒரு தெளிவான அறிவைக் கொண்டிருந்தார். எனவே அவர் ஒரு மொழியியலாளர். அதேவேளையில் அவர் தனது ஆய்வுக்கு எடுத்துக்கொண்டது தமிழ்மொழி அமைப்பு ... இலக்கணம். அந்தவகையில் அவர் தமிழ் இலக்கண ஆசிரியர்'' என்று நான் கூறுவேன்.

தொல்காப்பியர் ஒரு மொழியியலாளராக இல்லையென்றால் அவரால் தொல்காப்பியம் என்ற ஒரு மாபெரும் தமிழ் இலக்கண நூலை உருவாக்கி- யிருக்கமுடியாது. தன் காலத்திற்கு முந்தியும் தன் காலத்திலும் நிலவிய தமிழ் இலக்கியங்களையும் பிற தமிழ் வழக்குக்களையும் முறையான ஆய்வுமுறைகொண்டு, தரவுகளாக உருவாக்கி... பின்னர் தான் உருவாக்கிய தமிழ்த்தரவுகளை முறையான ஆய்வுமுறைகொண்டு ஆராய்ந்து .... தமிழ் அமைப்புபற்றிய ஒரு தெளிவைப் பெற்றார். பின்னர் தான் பெற்ற தமிழ்மொழி அமைப்பு அறிவை முன்வைக்கும்போது, எந்த இயலை முதலில் வைக்கவேண்டும், எந்த இயலை பின்னர் வைக்கவேண்டும் என்பதில் அவருக்கிருந்த ஒரு தெளிவின் அடிப்படையில் ''தொல்காப்பியம்'' என்ற ஒரு மிகச் சிறந்த ''தமிழ் இலக்கண நூலை'' உருவாக்கினார். இதற்காக அவர் தான் பின்பற்றிய ஆய்வுமுறைகளைத் தனியே எடுத்து எழுதியிருந்தால், அவர் ''மொழியியல்'' நூலையும் படைத்தவராக இருந்திருப்பார். மேலும் தமிழ்மட்டுமல்லாமல், வேறு மொழிகளையும் ஆராய்வதற்கு அவருக்குத் தேவை ஏற்பட்டிருந்தால், தனது மொழி ஆய்வில் காணப்படும் பொதுமைக்கூறுகளை ஒரு மிகச் சிறந்த மொழியியல் நூல்மூலம் வெளிப்படுத்தியிருப்பார். இதுபோன்ற ஒரு வாய்ப்பு... மொழி ஆய்வில் வளர்ச்சிநிலை .. மனித சமூக வளர்ச்சியில் பிற்காலத்தில்தான் - குறிப்பாக 17 ஆவது நூற்றாண்டுக்குப்பின்னர்தான் ஏற்பட்டது. தத்துவவாதிகள் சிலர் தங்களது தத்துவங்களில் மனித அறிவுக்கும் மொழிக்கும் இடையில் உள்ள உறவுகள்பற்றி ஆங்காங்கே சில கருத்துக்களை முன்வைத்துள்ளார்கள். ஆனால் ''மொழியியல்'' என்ற ஒரு தனி அறிவியல் அப்போது தோன்றி வளரவில்லை.

மனித இனத்திற்கும் அறிவியல் வளர்ச்சிக்கும் இடையிலான உறவுகள்பற்றி அறவியலாளர்கள் ஜே டி பர்னால் ( JD Barnal - "Science in History") , ஜோசப் நீதாம் (Joseph Needham - "Science and Civilization in Ancient China") போன்ற நூல்களில் தெளிவுபடுத்தியுள்ளார்கள். ஒரு அறிவியல் கண்டுபிடிப்புக்கு - ஒரு அறிவியல் துறைக்கு - தேவையான வளர்ச்சிநிலையும் அதற்கான வாய்ப்புக்களும் உருவாகும்போதுதான் அத்துறை தோன்றி நீடிக்கும். இன்றைக்கு உள்ள பல்வேறு அறிவியல் துறைகள் சென்ற நூற்றாண்டில் கிடையாது.

அதுபோன்றே பல்வேறு நாடுகளுக்கிடையே தொடர்புகள் ஏற்பட்டபோது .... பல்வேறு மொழிகளைப் பேசுகின்ற மனித இனத்தினரிடையே உறவுகள் ஏற்படும்போது - ஒருமொழி தாண்டி, பல மொழிகளை ஒப்பிட்டுப் பார்க்கக்கூடிய ஒரு வாய்ப்பும் தேவையும் ஏற்படும்போதுதான் ... பொதுவான மொழியியல் தோன்றமுடியும். எனவேதான் 17 ஆவது நூற்றாண்டுக்குப்பின்னர்தான் ''மொழியியல்'' என்ற ஒருதுறை தோன்றி நீடிக்கத்தொடங்கியது. மனித மொழிகள் ஆயிரக்கணக்கில் இருந்தாலும், அவற்றிற்கான அமைப்புக்களில் பல ஒற்றுமைக் கூறுகள் கண்டறியப்பட்டன. மொழி ஆய்விலும் பல பொதுமைக் கருத்துக்கள் தோன்றி நிலவின.

இந்த வளர்ச்சிக்குப்பின்னர் ... எந்த ஒரு மொழி ஆய்வையும் மேற்கொள்ள... பொதுவான, தெளிவான, புறவயமான ஆய்வுமுறைகள் முன்வைக்கப்பட்டன. மேலும் ஒரு மொழியின் அமைப்பை மட்டுமல்லாமல், மொழிக்கும் மனித சமூகத்திற்கும் இடையில் உள்ள உறவுகள், மொழிக்கும் மனித மூளை, மனம் ஆகியவற்றிற்கிடையில் உள்ள உறவுகள் போன்றவைபற்றியும் மொழியியலில் கிளைகள் தோன்றி வளர்ந்துள்ளன. மேலும் ஒரு மொழிக்கான அகராதியை எவ்வாறு உருவாக்குவது, ஒரு மொழியை எவ்வாறு கற்றுக்கொடுப்பது, மொழிபெயர்ப்பை எவ்வாறு மேற்கொள்வது, மொழியைத் திட்டமிட்டு எவ்வாறு வளர்ப்பது, கணினிக்கு எவ்வாறு மொழி அறிவைக் கொடுப்பது போன்ற பல துறைகள் தோன்றி இன்று நிலவுகின்றன.

மொழியியல் துறையில் முறையான பயிற்சி பெற்றவர்கள் .. தங்கள் தாய்மொழியைமட்டுமல்லாமல் .. பிற எந்தவொரு மொழியையும் ஆய்வு செய்யும் நுட்பங்களையும் கற்றிருப்பார்கள். எழுத்துவடிவமே இல்லாத பழங்குடி மக்களின் மொழிகளையும் கள ஆய்வுமூலம் தரவுகள் சேகரித்து, அந்த மொழிகளுக்கான இலக்கணங்களை உருவாக்கி முன்வைப்பார்கள்.

தமிழகத்தில் உள்ள மொழியியல் துறையினர் தாங்கள் கற்ற மொழியியல் ஆய்வுமுறைகளைக்கொண்டு, இன்றைய தமிழின் பல்வேறு பண்புகளைக் கண்டறிகிறார்கள். தொல்காப்பியம், நன்னூல் போன்ற தமிழ் இலக்கண ஆசிரியர்களின் மதிநுட்பங்களை உலக அளவில் கொண்டு செல்கிறார்கள். ஆனால் இந்த ''மொழியியல்'' துறையைச் சிலர் ''ஆங்கில இலக்கணம்'' என்று தாங்களே நினைத்துக்- கொள்கின்றனர். இது தவறு. தமிழ்நாட்டில் பிற அறிவியல் நூல்கள் எல்லாம் பெரும்பாலும் ஆங்கிலத்திலேயே இருப்பதுபோன்று, மொழியியல் நூல்களும் ஆங்கிலத்திலேயே இங்குக் கிடைக்கின்றன. இந்த நிலை மாறவேண்டும என்பது உண்மை. ஆனால் அதற்காக மொழியியலே 'ஆங்கில இலக்கணம்'' என்று நினைத்துவிடக்கூடாது. அப்படியென்றால் 'ஆங்கில இயற்பியல்' 'ஆங்கில வேதியியல்' 'ஆங்கில உயிரியல்' என்று நாம் கற்கும் அறிவியல்துறைகளைக் கூறமுடியுமா?

இவ்விடத்தில் ஒரு கருத்தை வலியுறுத்த விரும்புகிறேன். தமிழின் சிறப்பையும், தமிழ் இலக்கணங்களின் சிறப்பையும் உலக அளவில் கொண்டு செல்வதற்கு மொழியியல் துறை மிகவும் பயன்படும். நமக்குள்ளேயே நமது பெருமைகளைக் கூறிக்கொண்டிருக்காமல், பிற மொழியியனரும் தமிழின் சிறப்பை அறிந்துகொள்ள மொழியியல் துறையே மிகவும் பயன்படும்.

ஆனால் மொழியியல் துறையைச் சேர்ந்த ஒருவர் முதலில் தன் தாய்மொழி இலக்கணத்தை நன்குத் தெரிந்திருக்கவேண்டும். அப்போதுதான் அவரால் மொழியியல் துறையில் பங்காற்றமுடியும். அதுபோன்று தமிழ்மொழி ஆய்வாளர்களும் மொழியியல் துறையில் பயிற்சிபெற்றிருக்கவேண்டும். இன்றைய காலகட்டத்தில் ஒரு மொழி ஆய்வாளர் தனது மொழியில் சிறந்த புலமை பெறவேண்டுமென்றால் ... தமிழ் இலக்கணங்கள் (தொல்காப்பியம் முதல்) , மொழியியல் இரண்டிலும் நல்ல பயிற்சி பெற்றிருக்கவேண்டும். தமிழின் வரலாற்று இலக்கணத்தில் புலமைபெறவேண்டுமென்றால், பழந்தமிழ் இலக்கியங்களிலும் தேர்ச்சி உடையவர்களாக இருக்கவேண்டும். தமிழுக்கும் பிற மொழிகளுக்கும் இடையில் உள்ள உறவுகள் பற்றிய ஆய்வில் ஈடுபடுபவர்கள் ''வேர்ச்சொல் அகரமுதலி' துறையிலும் பயிற்சி பெற்றிருக்கவேண்டும்.

இங்கு நான் மீண்டும் வலியுறுத்த விரும்புவது.... மொழியியலையும் இலக்கணங்களையும் எதிரெதிரே நிறுத்தக்கூடாது. மொழியியல் துறையில் சிறப்பு பெற, தமிழ் இலக்கணங்களில் புலமை வேண்டும். தமிழ் இலக்கணங்களில் தேர்ச்சிபெற மொழியியல் துறை அறிவும் தேவைப்படும்.

எனவே மொழியியல் துறையை ஆங்கில இலக்கணம் என்று கருதக்கூடாது. கருதவேகூடாது.

Read more »