மொழிபயிற்றலில் ( Language Teaching) இன்றுள்ள பிரச்சினை... (2)

மொழிபயிற்றலில் ( Language Teaching) இன்றுள்ள பிரச்சினை... ( மொழி பயிற்றலில் ஆர்வம் உள்ளவர்களுக்கு மட்டும் .) (2)
----------------------------------------------------------------

நேற்று நான் கூறிய மொழிபயிற்றல் வழிமுறைகளில் '' நேரடி முறை'' Direct Method என்பதையும் இணைத்துக்கொள்ளவும். இந்த வழிமுறையில் மாணவர்களின் சூழலை முழுமையாகப் பயிலுகிற குறிப்பிட்டமொழிச் சூழலாகவே மாற்றி அமைப்பது ஆகும். அதாவது மாணவர்கள் தங்கள் நடைமுறைச் சூழலில் அந்த மொழியை மட்டுமே பயன்படுத்தவேண்டும். அவ்வாறு பயன்படுத்துவதால், அவர்களுக்கு அந்த மொழியின் இலக்கணமும் சொற்களும் பற்றிய அறிவு வந்துவிடும் கூறப்படுகிறது. 

மொழி பயிற்றல் கோட்பாடுகளைப்பற்றி உரையாடுவதற்குமுன்னர் சிலவற்றைத் தெளிவுபடுத்திக்கொள்ளவேண்டும்.

மொழி பயிற்றல்பற்றிய கலந்துரையாடலில் ஒரு சிலவற்றைத் தெளிவாக வரையறுத்துக்கொள்ள வேண்டும். முதல்மொழி, இரண்டாம்மொழி, மூன்றாம் அல்லது அந்நியமொழி என்ற வேறுபாடு... தமிழகத்தில் தமிழ் முதல்மொழி .... ஆங்கிலம் இரண்டாவது மொழி. ஆங்கிலத்தை இங்கு வகுப்புக்கு வெளியேயும் பயன்படுத்த வாய்ப்பு உண்டு. வகுப்பறையில் பெற்ற ஆங்கில மொழி அறிவைக் கொண்டு மாணவர்கள் வகுப்பறைக்கு வெளியேயும் கருத்துப்புலப்படுத்தச் செயல்களுக்குப் பயன்படுத்தலாம்.

தமிழகத்தில் பல பள்ளிகளில் பிரெஞ்சும் கற்றுக்கொடுக்கப்படுகிறது. ஆனால் வகுப்பறையில் பெறுகிற பிரெஞ்சுமொழி அறிவைப் பயன்படுத்திப் பார்க்க வகுப்பறைக்கு வெளியே வாய்ப்புகள் கிடையாது. எனவே பிரெஞ்சுமொழிக் கல்வியை மூன்றாம் மொழி அல்லது அந்நியமொழி என்று கூறலாம். மேலும் பிரெஞ்சுமொழியைத் தாய்மொழியான தமிழ்மூலம் கற்காமல், இரண்டாம்மொழியான ஆங்கிலம்மூலம் மாணவர்கள் கற்றுக்கொள்கிறார்கள் என்பதையும் கவனத்தில் கொள்ளவேண்டும்.

மொழி பயிலுகின்றவர்களின் வயது மிக முக்கியம்.... மூன்றிலிருந்து எட்டுவயதுவரை உள்ள மாணவர்கள் மொழியைக் கற்றுக்கொள்ளும்போது, விரைவாகக் கற்றுக்கொள்கிறார்கள். அடுத்து ஒன்பதிலிருந்து பதின்மூன்று... அடுத்து, பதினான்கிலிருந்து பதினெட்டு... இவ்வாறு வயது கூடக்கூட ஒரு மொழியைக் கற்றுக்கொள்ளும் வேகம் குறைகிறது என்பது உளவியல்மொழியியில் ஆய்வாளர்களின் கருத்து... இதற்கு அடிப்படை.... மூளையின் இளகுதன்மை ... Plasticity.

குழந்தைகளைப் பொறுத்தமட்டில்.... ஒன்றுக்கு மேற்பட்ட மொழிகளை ஒரேநேரத்தில் குழப்பமின்றி கற்றுக்கொள்ளமுடியும் (Simultaneous Acquisition ) என்று இத்துறை சார்ந்தவர்கள் கூறுகிறார்கள்! அதற்குக் காரணம்... குழந்தை ஒரு மொழியைக் கற்றுக்கொள்ளும்போது, அதை தனக்குத் தெரிந்த தாய்மொழியோடு ஒப்பிட்டுக் கற்றுக்கொளவதில்லை... ஒவ்வொரு மொழியையும் அந்தந்த மொழியாகவே கற்றுக்கொள்கிறது. ஆனால் பெரியவர்கள் ஒரு அந்நிய மொழியைக் கற்றுக்கொள்ளும்போது, தங்களது தாய்மொழி அல்லது தமக்குத் தெரிந்த மற்றொரு மொழியோடு ஒப்பிட்டுப் பார்க்கிறார்கள். இது மொழி கற்றலின் வேகத்தைக் குறைக்கும் என்று கூறப்படுகிறது.

அடுத்து, தமிழ்மொழியில் நிலவும் இரட்டைவழக்குச் சூழல்.... குழந்தை பிறந்து வளரும்போது , இயற்கையாகப் பெற்றுக்கொள்கிற மொழி வழக்கு... பேச்சுத்தமிழ் வழக்கே ஆகும். குழந்தை பள்ளிக்குச் செல்லும்போது... பேச்சுத்தமிழில் முழுமையான திறனோடு செல்கிறது. அங்கு அதற்கு எழுத்துவழக்குத் தமிழ் கற்றுக்கொடுக்கப்படுகிறது. பேச்சுத் தமிழுக்கும் எழுத்துத்தமிழுக்கும் அடிப்படையான இலக்கணம் பெரும்பாலும் ஒன்றாக இருப்பதால், ஆங்கிலம் போல் அல்லாமல், எழுத்துத்தமிழைக் குழந்தை விரைவாகக் கற்றுக்கொள்கிறது. பேச்சுவழக்கைக் குழந்தை பேச்சுவாயிலாகவே பெற்றுக்கொள்கிறது. ஆனால் எழுத்துத்தமிழைப் பிரதானமாக எழுத்துவழியாகக் கற்றுக்கொள்கிறது. வாசிப்புவழியாகவும் கற்றுக்கொள்கிறது. பாடல்கள், கதைகள் போன்றவற்றைப் பேச்சொலி வழியாகவும் கற்றுக்கொள்கிறது. இருப்பினும் பேச்சுவழக்கின் செல்வாக்கானது குழந்தையானது எழுத்து வழக்கைக் கற்றுக்கொள்வதில் வெளிப்படுகிறது. சற்றுப் பாதிக்கவும் செய்கிறது.

மேற்கண்டவற்றின் அடிப்படையில் (1) முதல்மொழி, இரண்டாம்மொழி, மூன்றாம்மொழி பயிற்றல்களில் வேறுபட்ட அணுகுமுறை தேவை. (2) இளம் வயதினருக்கா அல்லது முதியவர்களுக்கா என்பதையும் கணக்கில் கொள்ளவேண்டும்.

Read more »

மொழிபயிற்றலில் ( Language Teaching) இன்றுள்ள பிரச்சினை.. (1)

மொழிபயிற்றலில் ( Language Teaching) இன்றுள்ள பிரச்சினை... ( மொழி பயிற்றலில் ஆர்வம் உள்ளவர்களுக்கு மட்டும் .) (1)

'' அவருக்குப் பேசத் தெரியவில்லை! யாரிடம் பேசுகிறோம், எதைப் பற்றிப் பேசுகிறோம், எப்படி பேசுகிறோம் என்று தெரியாமல் பேசுகிறார். படித்து என்ன பயன்? '' என்று சிலரைப்பற்றி நாம் கூறியிருப்போம் அல்லது நினைத்திருப்போம்! அதுபோன்று '' என்ன எழுதியிருக்கிறார்? எதை எப்படிச் சொல்லவேண்டுமென்று தெரியவில்லை. எம் ஏ படித்திருக்கிறாராம்! என்ன பிரயோசனம்? '' என்று சிலருடைய எழுத்துகளைப்பற்றி (தமிழ் அல்லது ஆங்கிலம்) நினைத்திருப்போம்!

இங்கு நாம் பார்க்கவேண்டியது ..... பேசியவருக்கு அல்லது எழுதியவருக்குத் தமிழோ அல்லது ஆங்கிலமோ எழுத, வாசிக்க, பேச, கேட்டுணரத் திறமை இல்லை என்று நாம் நினைக்கவில்லை. இலக்கணமெல்லாம் தெரிந்திருக்கலாம். இலக்கணத்தில் 100 விழுக்காடு மதிப்பெண் பெற்றிருக்கலாம்! ஆனால் ... கருத்துப்புலப்படுத்தத் திறன் ( Communicative Performance) இல்லை! இதுவே நமது விமர்சனம்!

ஏன் இந்த நிலை? மொழிபயிற்றல் ( Language Teaching) என்றால், குறிப்பிட்ட மொழியின் இலக்கணத்தையும் சொற்களையும் ( grammar & words) கற்றுக்கொடுப்பதே என்ற ஒரு நிலை இன்னும் நீடிப்பதுதான்! மொழிப்பாடத்தின் அடிப்படையே இலக்கணம் என்று ஒரு தவறான கருதுகோள்! இங்கு மட்டுமல்ல, மேலைநாடுகளிலும் இந்த நிலைதான் 50, 60 ஆண்டுகளுக்கு முன்னர் நீடித்தது! இலக்கணத்தையும் சொற்களையும் எவ்வாறு கற்றுக்கொடுப்பது (methods of language teaching) , பயிற்றுவிப்பது என்பதில் பல மாற்றங்கள் முன்வைக்கப்பட்டன! நேரடியாக இலக்கணத்தைச் சொல்லிக்கொடுப்பதா (Grammar -Translation method) , அல்லது கேட்டல்-பேசுதல் முறையில் (Audio-lingual method) கற்றுக்கொடுப்பதா அல்லது சூழல் அடிப்படையில் (Situational method) கற்றுக்கொடுப்பதா என்ற விவாதமே நீடித்தது. அதாவது மொழிபயிற்றலின் பாடத்திட்டம்(content of syllabus) மாறவில்லை... ஆனால் வழிமுறைகள் (teaching methods) மாற்றப்பட்டன!

பின்னர் ... ஒரு கட்டத்தில் ... இலக்கணத்தை அடிப்படையாகக்கொள்ளாமல், பல்வேறு சூழலுக்கேற்ற தொடர்களைக் கற்றுக்கொடுக்கும் பாடத்திட்டமே ( Situational Syllabus)) சரியானது என்று கூறப்பட்டது. இதில் ஒரு பிரச்சினை... கற்றுக்கொடுத்த சூழல்களில் மாணவர்கள் சரியான மொழித்தொடர்களைப் பயன்படுத்தும் திறனைப் பெறலாம். ஆனால் புதிதாக ... கற்றுக்கொடுக்காத ஒரு சூழலைச் சந்தித்தால்? சிக்கல்தான்! எனவே இதுவும் சரியில்லை...

மாற்றாக , இந்த மொழிவழிச் செயலுக்கு ( for a particular speech act) இந்தவகைத் தொடர் .... ஒன்றை வேண்டுவதற்கு ( Request Act) ஒரு வகைத்தொடர்... ஒன்றை மறுப்பதற்கு( Refusal Act) ஒரு வகைத்தொடர்... ஒன்றை ஏற்றுக்கொள்வதற்கு ( Accepting Act) ஒரு வகைத்தொடர் என்று பலவகைப்பட்ட மொழிவழிச் செயல்களுக்கு ஏற்ற பலவகைத் தொடர்களைக் கற்றுக்கொடுப்பதே சரி என்று நினைத்தார்கள். அதுபோன்று 'இயல்வதைக்கூற (ability) இந்த வினைச்சொல், இயலாமையைக்கூற ( inability) இந்த வினைச்சொல், முடியாது ( impossibility) என்பதை வெளிப்படுத்த இந்த வினைச்சொல், வாய்ப்பு உண்டு ( Possibility) என்பதை வெளிப்படுத்த இந்த வினைச்சொல் ... '' என்ற கருத்துநோக்கின் ( different semantic concepts/ moods) அடிப்படையிலும் தொடர்கள் கற்றுக்கொடுக்கப்பட்டன. முந்தைய மொழிப்பாடத்திட்டங்களைவிட இது சிறந்ததாகத் தோன்றினாலும், ஒருவர் ஒரு குறிப்பிட்ட உரையாடலில் பல்வேறு மொழிவழிச் செயல்களை ... கருத்துநோக்குகளை .... இணைத்து ஒரு முழுமையான உரையாடல்களைச் ( Coherent discourse) செய்ய இந்தப் பாடத்திட்டம் சரியாக இருக்காது.

ஒரு முழுமையான கருத்தாடலில்.... Discourse ... ( விளக்கக்கட்டுரை, மறுப்புக் கட்டுரை, விமர்சனக் கட்டுரை, பாடம் எடுக்கும் கருத்தாடல் என்று பலவகை கருத்தாடல்கள்) பல மொழிவழிச்செயல்களையும் கருத்துநோக்குகளையும் இணைத்து எவ்வாறு கருத்துப்புலப்படுத்தம் செய்வது (act of communication).... இலக்கியக் கருத்தாடல், அறிவியல் கருத்தாடல், விமர்சனக் கருத்தாடல், வகுப்பறைக் கருத்தாடல், ஆய்வுரைக் கருத்தாடல் ( முகநூல் கருத்தாடல் உட்பட ! ) என்று பலவகைப்பட்ட கருத்தாடல்களை எவ்வாறு மேற்கொள்வது என்பதைக் கற்றுக்கொடுக்கும் பாடத்திட்டமே ... மொழிபயிற்றலில் பின்பற்றப்பட வேண்டும் என்ற கருத்து இன்று வலியுறுத்தப்படுகிறது!.

மொழிபயிற்றல் என்பது வெறும் இலக்கணத்தையும், சொற்களையும், தொடர்களையும் கற்றுக்கொடுப்பது அல்ல... கருத்துப்புலப்படுத்தத்திற்காகத்தான் மொழி ( language is for communication) ...எனவே அந்த நோக்கிலேயே மொழிப்பாடம் அமையவேண்டும் என்பது இன்றைய மொழிபயிற்றல் அறிவியலில் ( Language Teaching Science) முன்வைக்கப்படுகிறது. கருத்துப்புலப்படுத்த அடிப்படையில் பாடத்திட்டத்தை எப்படி உருவாக்குவது .... அந்தப் பாடத்திட்டத்தை எவ்வாறு கற்றுக்கொடுப்பது... இதுபற்றி அடுத்து எழுதுகிறேன்!

Read more »

ஆங்கிலத்தில் படித்தால்தான் அறிவியலா?

ஆங்கிலத்தில் படித்தால்தான் அறிவியலா? 

------------------------------------------------------------------------

இன்று ( ஜூலை 7, 2016) தமிழ் 'தி இந்துவில்' ஒரு செய்தி! தமிழ்வழி பொறியியல் படிப்பில் 1257 இடங்கள் காலி! 121 பேர்மட்டுமே இதுவரை சேர்ந்துள்ளனர். அதற்குக் கூறப்பட்டுள்ள காரணம் ..... '' தனியார் துறையில் வேலைவாய்ப்பு குறைவாக இருப்பதால், தமிழ்வழிப்பிரிவில் சேர மாணவர் தயக்கம் காட்டுகின்றனர்.. தமிழ்வழி பொறியியல் பட்டதாரிகளுக்கு கேம்பஸ் இன்டர்வியூ வேலைவாய்ப்புகள் குறைவு. வேலைக்குத் தேர்வுசெய்யப்பட்டாலும் குறைந்த சம்பளமே கிடைக்கிறது. படித்து முடிக்கும் அனைவர்க்கும் எப்படி அரசு வேலைவாய்ப்பு கிடைக்கும்? அரசு வேலைவாய்ப்பை மட்டுமே நம்பி, தமிழ்வழி பொறியியல் படிப்பில் சேரமுடியுமா என்று மாணவர்கள் கேட்கின்றனர்''

எனக்குள்ள ஐயங்கள்.....

1) தமிழில் படித்தாலும், ஆங்கிலத்திலும் படித்தாலும், பொறியியல் அறிவு ஒன்றுதானே? ஆங்கிலத்தில் அமைந்துள்ள பொறியியல் பாடங்கள் வேறு... தமிழில் அமைந்துள்ள பொறியியல் பாடங்கள் வேறா? எவ்வளவு பெரிய மூடநம்பிக்கை ...

2) சரி. அயல்நாட்டு நிறுவனங்களில் வேலைபார்க்க ஆங்கில அறிவு தேவை என்று வைத்துக்கொள்வோம். ஆங்கிலத்தை - ஒரு மொழியாக - சிறப்பாக மாணவர்கள் கற்றுக்கொள்ளலாமே! அறிவு வேறு.... அறிவைப் பெறுகின்ற மொழி வேறு. ஆங்கிலத்தில் படித்தால்தான் அறிவா? அறிவைத் தாய்மொழியில் பெற்றுவிட்டு, அந்த அறிவை ஆங்கிலத்திலும் வெளிப்படுத்தத் தேவையான English for Technology என்று சிறப்பு ஆங்கிலத்தை நன்றாகக் கற்றுக்கொள்ளலாமே!

3) ஆங்கிலத்தில் படித்துவிட்டு, ஜெர்மனியில் அல்லது பிரான்ஸில் வேலைபார்க்கவேண்டிய ஒரு சூழலில், ஒருவர் என்ன செய்கிறார்? அங்கெல்லாம் அவர்கள் நாட்டு மொழியில்தானே வேலை நடைபெறுகிறது. அங்கு சென்றபின்னர், அந்த மொழியைக் கற்றுக்கொள்ளவில்லையா?

4) மொழிக்கல்விக்கும் பாடங்களைக் கற்றுக்கொளவதற்கும் உள்ள வேறுபாட்டைச் சரியாகப் புரிந்துகொள்ளாத காரணத்தால்தானே இதுபோன்ற மூடநம்பிக்கைகள் நிலவுகின்றன? தாய்மொழி அல்லாத தேவைப்படுகிற பிற மொழிகளை மொழிக்கல்வியில் பெறுமுடியாதா?

5) சாம்ஸ்கி கூறியுள்ளதுபோல ( Manufcturing consent) , ஆங்கிலம்பற்றிய ஒரு தவறான எண்ணத்தை - ஆங்கிலம் இருந்தால்தான் வேலை அல்லது அறிவு என்ற மூடநம்பிக்கையை - மக்களிடம் உருவாக்கி வைத்துவிட்டு, அதனடிப்படையில் மக்கள் அப்படி விரும்புகிறார்கள் என்று கூறுவது சரியா?

6) ஆங்கிலத்தையோ அல்லது வேறு எந்த மொழியையோ மொழியியல் பின்னணியில் மிகக் குறைந்த காலத்தில் கற்றுக்கொள்ளலாம். அதற்கான பல வழிமுறைகள் மொழிபயிற்றல் என்ற செயற்படுத்த மொழியியலில் உருவாக்கப்பட்டுள்ளன.' ஆடத் தெரியாதவளுக்குத் தெரு கோணல்' என்ற பழமொழிபோல, பயிற்றுமொழிக்கும் மொழிக்கல்விக்கும் உடையில் உள்ள வேறுபாட்டைப் புரிந்துகொள்ளாமல் ... ஆங்கிலத்தில் பாட அறிவைப் பெறவில்லையென்றால், அறிவே இருக்காது... வேலை வாய்ப்பே இருக்காது என்று நினைப்பது சரியா'

இதுபோன்ற மூடநம்பிக்கைகளை அகற்றாமல், தமிழகத்தில் தமிழ் வளர்ச்சியை - தமிழ்ப் பரவலை - ஏற்படுத்துவது மிகக் கடினம்.

மூன்று மாதங்களில் அடிப்படை ஆங்கிலத்தையும் அடுத்துச் சில காலங்களில் உயர்நிலை ஆங்கிலத்தையும் கற்றுக்கொடுக்கமுடியும் ... தேவைப்பட்டால்! எனவே மாயைகளில் ... மூடநம்பிக்கைகளில் நாம் வாழக்கூடாது! மொழி ஏகாதிபத்தியத்தை அடியோடு ஒழிக்கவேண்டும்

ஆங்கில நீடிப்புக்கு .... ஒரு முக்கியக் காரணம்... நமது தொழில் உற்பத்தி அந்நிய நாடுகளின் தொழில்நிறுவனங்களின் கைகளில் இருக்கிறது. நாம் என்ன படிக்கவேண்டும்... எந்த மொழியில் படிக்கவேண்டும் என்பதை அவையே தீர்மானிக்கின்றன! அதுமட்டுமல்ல... என்னென்ன பொருள்களை வீடுகளில் உபயோகிக்கவேண்டும்... பீசா, கேக், பர்கர் போன்று எதையெதைச் சாப்பிடவேண்டும்.. எந்த மருந்துகளைச் சாப்பிடவேண்டும்.... எதுவுமே நம் கைகளில் இல்லை! .. அது மட்டுமா? நமது மென்பொருள் பொறியியலாளர்கள் தாங்கள் பிறந்து வளரும்போது தூங்கி எழுகிற நேரத்தைக்கூட அவைதான் தீர்மானிக்கின்றன. அந்நிய நிறுவனங்களுக்குப் பகல் என்றால் ... நமக்கு இரவு!. எனவே அவர்கள் பகலில் வேலைபார்க்கும்போது.... அவர்களுக்காக நமது பொறியியலாளர்கள் இரவில் வேலைசெய்யவேண்டும! இதைவிட ஒரு மோசமான சூழல் எங்காவது நீடிக்குமா? இதற்கிடையில் நம் சிந்தனையை மழுங்கடிக்க .... கிரிக்கெட், தொலைக்காட்சி. சூப்பர் சிங்கர் ... மோசமான சூழலா அல்லது கேவலமான சூழலா?

நான் முதல்வகுப்பு முதல் 11 ஆம் வகுப்புவரை தமிழ்வழிக்கல்வியில்தான் படித்தேன். பின்னர் கல்லூரியில் தமிழ்வழிக்கல்வி இல்லாததால் இளங்கலை ஆங்கிலவழிக் கல்வியில் படித்தேன். பின்னர் தமிழ் முதுகலை படித்தேன். பின்னர் முதுகலை மொழியியல் ஆங்கிலத்தில் படித்தேன். முனைவர் பட்டம் அப்போது ஆங்கிலத்தில்தான். பிரச்சினை இல்லை. எனவே ஆங்கிலவழிக் கல்வியில் படிக்காததால் ஆங்கில அறிவு இருக்காது என்பது தவறான கருத்து. எனவே தமிழ்வழிக்கல்வியில் படித்ததால், ஆங்கிலம் பேசமுடியாது, பயன்படுத்தமுடியாது என்பது தவறு. எனது மகனையும் பள்ளிக்கல்வியில் தமிழ்வழிக்கல்வியில்தான் படிக்கவைத்தேன். இன்று அமெரிக்காவில் வேலைபார்க்கிறான். ஆங்கிலத்தில் பிரச்சினை இல்லை. நானும் தமிழிலும் ஆங்கிலத்திலும் ஆய்வுக் கட்டுரைகள் எழுதுகிறேன். மொழி ஒரு பிரச்சினையாகத் தெரியவில்லை! சாம்ஸ்கியின் மொழியியல் நூல்கள் அனைத்தும் ஆங்கிலத்தில்தான் இருக்கின்றன. ஆனால் அதைச் சரியாக உணர்ந்து தமிழில் எழுதமுடிகிறது. மூளையில் கருத்துத் தெளிவு இருந்தால், தாய்மொழியியல் தானாக அது வெளிவரும். சில கலைச்சொற்களில் சிக்கல் வரலாம். அதையும் தீர்க்கமுடியும்.

Read more »

மொழியியல் தமிழ்மொழிக்கு எதிரானதா?

வினா : மொழியியல் தமிழ்மொழிக்கு எதிரானது, அது உண்மையான தமிழ்மொழி ஆய்வுக்கு எதிரானது என்று கூறப்படும் கருத்து சரியா?

விடை: இல்லை. பிற அறிவியல்கள்போன்று சமூக வளர்ச்சியில் தேவையையொட்டித் தோன்றி வளர்ந்துள்ள ஒரு அறிவியல்தான் மொழியியல். குறிப்பிட்ட மொழிபற்றிய ஆய்வாக இல்லாமல், பொதுவாக ‘மனித மொழி’ என்பதை ஆய்வு செய்வதற்கான வழிமுறைகளை முன்வைக்கின்ற ஒரு அறிவியலே இது. ஆய்வுகளுக்குக் கருதுகோள்களை முன்வைப்பது, அவற்றின் அடிப்படையில் ஆய்வுகளை மேற்கொள்வது, அந்த ஆய்வுகளின் அடிப்படையில் மொழிபற்றிய கோட்பாடுகளையும் கொள்கைகளையும் முன்வைப்பது போன்றவற்றை உள்ளடக்கியதுதான் மொழியியல். மொழியின் அமைப்பைப்பற்றி மட்டுமல்லாமல், மொழிக்கும் மனித மூளைக்கும் உள்ள தொடர்பு, மொழிக்கும் சமூகத்திற்கும் இடையில் உள்ள தொடர்பு, மொழிக்கும் மனித மனத்திற்கும் உள்ள தொடர்பு என்று பல முனைகளில் வளர்ந்துள்ளது மொழியியல். இந்தியாவில் 20 ஆம் நூற்றாண்டில்தான் இத்துறை அறிமுகமாகியது. பூனே டெக்காண் கல்லூரியில்தான் இந்த அறிவியலைப் பயிற்றுவிக்கும் கோடைகாலச் சிறப்பு வகுப்புகள் நடைபெற்றன. அதில் பயின்ற அல்லது பயிற்சியாளராகப் பணியாற்றிய பேராசிரியர்கள் தெ.பொ.மீ., வ.அய். சுப்பிரமணியம், முத்துச்சண்முகம்பிள்ளை, பி ஹைச் கிருஷ்ணமூர்த்தி போன்றவர்கள்தான் தென்னகத்தில் இந்தத் துறையைப் பல்கலைக்கழகங்களில் அறிமுகப்படுத்தினார்கள். தமிழகத்தில் அண்ணாமலைப் பல்கலைக்கழகத்திலும் கேரளப் பல்கலைக்கழகத்திலும் ஆந்திராவில் உஸ்மானியா பல்கலைக்கழகத்திலும் மொழியியல் துறைகள் நிறுவப்பட்டன. அவர்களின் வழிகாட்டுதலில் தமிழ்ப் பேராசிரியர்களாக உருவாகியிருந்த அகத்தியலிங்கம், இ. அண்ணாமலை, கு. பரமசிவம், இராம. சுந்தரம், குமாரசாமி ராஜா, தாமோதரன், செ.வை. சண்முகம், காமாட்சிநாதன், க. முருகையன், பா.ரா. சுப்பிரமணியன், இஸ்ரேல், விஜயவேணுகோபால் போன்றோர் தமிழ்மொழியை மொழியியல் அடிப்படையில் ஆராயத் தொடங்கினர். பேரா. வ. அய். சுப்பிரமணியம, அகத்தியலிங்கம், கு. பரமசிவம் போன்றோர் அமெரிக்காவிற்குச் சென்று சிறப்புப் பயிற்சிபெற்றார்கள். பின்னர் அவர்களின் மாணவர்களாகப் பேராசிரியர்கள் எம் எஸ் திருமலை, நீதிவாணன், கருணாகரன், சீனிவாசவர்மா, பொற்கோ, ஆர். கோதண்டராமன், ஞானசுந்தரம், கி. ரங்கன், ராஜாராம் போன்றார் மொழியியல் பயிற்சிபெற்றனர். இவர்களில் பெரும்பான்மையினர் தமிழ்ப்புலவர் படிப்பு பெற்றவர்கள். திராவிடமொழி ஒப்பிலக்கணம், தமிழ்மொழி வரலாறு, இன்றைய தமிழ் இலக்கணம், சங்கத்தமிழ் வரலாறு, பிற காலகட்டத் தமிழிலக்கியங்களின் மொழி ஆய்வு என்று பல்வேறு தலைப்புகளில் தமிழின் சிறப்பை உலகிற்கு எடுத்துக்காட்டியுள்ளனர். உலகமொழிகள், திராவிடமொழிகள், சங்கத்தமிழ், இன்றைய தமிழ் என்ற பல தலைப்புகளில் பேரா. அகத்தியலிங்கம் தமிழை ஆராய்ந்து, நூல்கள் வெளியிட்டுள்ளார். பொற்கோ இன்றைய தமிழுக்கான இலக்கணம், தமிழை அயல்நாட்டவர்க்குக் கற்பித்தல் , தமிழுக்கும் ஜப்பானியமொழிக்கும் இடையில் உள்ள உறவு போன்ற தலைப்புகளில் மிகச் சிறந்த ஆய்வுகளை மேற்கொண்டார். தமிழகத்தில் தமிழ்ப் பல்கலைக்கழகத்தின் முதல் துணைவேந்தராகப் பணியாற்றிய பேரா. வ.அய். சுப்பிரமணியம் தமிழாய்வை எவ்வாறு வளர்த்தெடுத்தார் என்பது அனைவருக்கும் தெரியும். அதுமட்டுமல்ல, தமிழ்நாடு, கேரளா, ஆந்திரா, கர்நாடகம் ஆகிய நான்கு மாநிலங்கள் அரசுகளின் உதவிகொண்டு, குப்பத்தில் திராவிடப் பல்கலைக்கழகத்தையே உருவாக்குவதில் அவர் பெரும்பங்காற்றினார். சிகாகோ பல்கலைக்கழகத்தில் தமிழ்மொழி வரலாற்றைப் பேரா. தெ.பொ.மீ. முன்வைத்தார். இன்றும் சிங்கப்பூர், மலேசியா, மொரீஷியஸ், ஜெர்மனி , அமெரிக்கா, கனடா, போலந்து போன்ற பல நாடுகளில் தமிழ்மொழியைப் பயிற்றுவித்து வருபவர்களில் பெரும்பாலோர் தமிழ்நாட்டில் மொழியியல் பயின்ற பேராசிரியர்கள்தான். இன்றைய தமிழுக்கான ஒரு சிறந்த அகராதியை அளித்த கிரியா அமைப்பில் அதற்காக உழைத்தவர்கள் பெரும்பாலும் மொழியியல் பின்னணி உள்ளவர்கள்தான். கணினித்தமிழிலும் மொழியியல் கல்வி பெற்றவர்கள் இன்று அளித்துவருகிற பங்கு தெரிந்ததே. இவ்வாறு தமிழ்மொழி ஆய்வுக்கும், தமிழ்க்கல்விக்கும் தமிழ் வளர்ச்சிக்கும் பெரும்பங்கு அளித்துவருகிற பேராசிரியர்கள் பலர் மொழியியல் துறையைச் சேர்ந்தவர்களாக இருக்கும்போது, மொழியியல் தமிழுக்கு எதிரானது என்று எவ்வாறு கூறமுடியும்? மேற்குறிப்பிட்ட மொழியியலார்கள் எல்லோரும் தமிழ் மொழியுணர்விலோ, மொழிக்காப்பிலோ குறைந்தவர்கள் அல்லர் என்பதையும் சுட்டிக்காட்ட விரும்புகிறேன்.

பேரா. ஆரோக்கியநாதன் அமெரிக்காவிற்குச் சென்றும் தமிழ்பற்றித்தான் ஆய்வு மேற்கொண்டார் . செம்மொழித்தமிழ் மத்திய ஆய்வு நிறுவனம் உருவாகி, இன்று சிறந்த முறையில் செயல்படுவதற்கு அரும்பாடு பட்ட பேரா. க. ராமசாமி மொழியியல் பேராசிரியர்தான். மைசூரில் இந்திய மொழிகளின் நடுவண் நிறுவனத்தில் பணியாற்றும் மொழியியல் பேரா. ல. ராமமூர்த்தி கடந்த பல ஆண்டுகளாகத் தமிழகத்தில் கணினித்தமிழ் பயிலரங்கம் பல நடத்தி, கணினித்தமிழ் வளர்ச்சிக்குப் பெரும்பாடு பட்டுவருகிறார். இவ்வாறு தமிழ் வளர்ச்சிக்காகப் பாடுபடுகிற மொழியியல் பேராசிரியர்களுடைய பணிகள் எல்லாம் தமிழுக்குத் தீங்கா விளைவித்துள்ளன? எனவேதான் என்னுடைய முகநூல் தொடரில் தமிழ் மரபு இலக்கண ஆய்வாளர்கள், இலக்கிய ஆசியர்கள், நாட்டுப்புறவியல் ஆய்வாளர்கள், மொழியியல் ஆய்வாளர்கள் அனைவரையும் பற்றி எழுதிவருகிறேன்.

இன்றைய எழுத்துத்தமிழுக்கு இலக்கணம் படைத்தவர்களில்  ஐவர் மொழியியல் பேராசிரியர்கள் - 1. பேரா. அகத்தியலிங்கம், 2. பேரா. பொற்கோ, 3, பேரா. கருணாகரன் 4. பேரா. கு. பரமசிவம் 5. பேரா. நுஃமான் . இதையும் நண்பர்கள் கவனத்தில் கொள்ளும்படி வேண்டுகிறேன்.

நண்பர்கள் பட்டாபு பத்மநாபன், முனைவர் முத்தையா இருவரும் முன்வைத்துள்ள கருத்துகள் அனைவரும் கவனத்தில் கொள்ளவேண்டியவை. (1) மொழியியலில் ஒருவர் உண்மையான தேர்ச்சி பெற வேண்டுமென்றால், அவருடைய தாய்மொழி இலக்கணத்தைத் தெளிவாகக் கற்றிருக்கவேண்டும். இல்லையென்றால் மொழியியலையே அவரால் புரிந்துகொள்ளமுடியாது. (2) அதுபோன்றே மரபிலக்கணங்களை நன்றாகப் புரிந்துகொள்ள இன்றைய மொழியியல் அறிவு நிச்சயமாகத் தேவை. தொல்காப்பியத்தின் நுட்பங்களைப் புரிந்துகொள்ளவும் அவற்றில் விடையளிக்கப்படாத ஐயங்களுக்குத் தெளிவுபெறவும் மொழியியல் கட்டாயம் தேவை. (3) கணினிமொழியியல் என்பது ஒரு தனித்துறை. அதற்கென்றே கோட்பாடுகளும் ஆய்வுமுறைகளும் உள்ளன. வெறும் மொழியியலும் வெறும் கணினியியலும் இணைந்த ஒரு துறை அல்ல அது. மொழியியலை அப்படியே கணினியில் பொருத்துவது அல்ல கணினிமொழியியல். அதற்கென்று தனிப்படிப்பும் ஆய்வும் தேவை. எனவேதான், கணினியியல் அறிவை மட்டும் கொண்டவர்களாலும் அத்துறையில் பங்களிக்கமுடியவில்லை. வெறும் மொழியியல் பின்னணி உள்ளவர்களாலும் பங்களிக்கமுடியவில்லை. இதனால்தான் சில கருத்தரங்குகளில் சிலருடைய கட்டுரைகள் சரிவர அமைவதில்லை. இதையே பல இடங்களில் நான் வலியுறுத்திவருகிறேன்.

மொழியியலுக்கு எதிராகக் கருத்துகளை முன்வைக்கும் நண்பர்கள் அந்தத்துறையைப்பற்றி த் தெரிந்து கொள்ளாமலேயே கருத்துரைக்கிறார்கள். அதுதான் எனக்கு வருத்தம். வரலாற்றில் பல அறிவியல்துறைகள் இதுபோன்ற எதிர்ப்புகளைச் சந்தித்துத்தான் வளர்ந்துள்ளன. மொழியியலுக்கும் இது பொருந்தும். இதுபோன்ற தவறான கருத்துரைகளால் மொழியியல் என்ற மொழி அறிவியலை வரலாற்றிலிருந்து யாரும் அழித்துவிடமுடியாது. சமூக வரலாற்றில் தேவையையொட்டித்தான் மொழியியல் தோன்றி வளர்ந்துள்ளது என்பதை நாம் உணரவேண்டும். தேவையில்லாததைச் சமுதாயமே கழித்துவிடும். கவலைவேண்டாம்.

Read more »

சாதிய மோதல்களுக்குத் தீர்வு என்ன?

சாதிய மோதல்களுக்குத் தீர்வு என்ன?
----------------------------------------------------------------

மருத்துவர் பொன்முடி ஐயா அவர்கள் கூறியுள்ளது:

// மாற்றம்வருவதென்பது அதற்கிணையானதன்று. சமூகவமைப்பில் சாதியைப்பொருத்தவரை மாற்றங்கள் நிகழ்ந்துள்ளனவென்பது உண்மையேயென்றாலும் அதனால் சாதிக்கட்டுமானமென்பது எந்தவகையிலும் மாறிவிடவில்லை. ...........................

சாதியை ஒழிப்பதென்பதொன்றும் எளிதானவொன்றாகத்தெரியவில்லை. அது நம் சமூகத்தில் ஒவ்வொருமனிதனுக்குள்ளும் ஆழமாய்ப்பதிந்துள்ளது. இதில் ஆண்பெண்வேறுபாடேதும் இல்லையென்பது எண்ணிப்பார்க்கத்தக்கது.//

எனது பதில் :

மருத்துவர் ஐயா அவர்களே! தாங்கள் கூறியுள்ளவை உண்மைகளே! ஆனாலும் ஒரு கருத்து! 100 ஆண்டுகளுக்குமுன்னர் இன்றைக்கு நாம் பார்க்கிற நேரடியான சாதி மோதல்கள் இல்லை! அதற்குக் காரணம் ... அன்று சாதியக் கொடுமைகள் இல்லை என்பது இல்லை. இன்று இருப்பதைவிட பன்மடங்கு அதிகமாக இருந்துள்ளது. ஒடுக்கப்பட்ட ... அடக்கப்பட்ட .. தாழ்த்தப்பட்ட சாதிகள் பொருளாதார ரீதியாகக் கிராமப்புற நிலப்பிரபுத்துவ அமைப்போடு மிக வலுமையாகப் பிணைக்கப்பட்டிருந்தது. சிந்தனைரீதியாகவும் '' அதுவே இயற்கை'' என்று திணிக்கப்பட்டிருந்தது. (உயர்சாதி) ஆண்டையின் நிலத்தோடு (தாழ்த்தப்பட்ட சாதியின்) அடிமை பிணைக்கப்பட்டிருந்தான். அங்கு நீடித்த வேலைப்பிரிவினையோடு பிணைக்கப்பட்டிருந்தான். அந்தப் பிணைப்பு மிக வலுமையாக நீடித்தது. எனவே ஆண்டைகளை எதிர்த்து, தாழ்த்தப்பட்ட உழைப்பாளிகள் போராட இயலவில்லை. ஆங்காங்கே சிற்சில போராட்டங்கள் நீடித்து இருக்கலாம்.

ஆனால் இன்று அந்தக் கிராமப்புற அமைப்பு .... முழுமையாகத் தகர்க்கப்படவில்லை என்றாலும் ... அது பல முனைகளில் தகர்க்கப்பட்டு ... பலவீனமுடைந்துள்ளது என்பது உண்மை. தாழ்த்தப்பட்ட ... ஒடுக்கப்பட்ட மக்கள் ... நிலத்தோடு ... பிற வேலைப்பிரிவினைகளோடு பிணைக்கப்பட்ட அடிமைச் சங்கிலிகள் இன்று வலுவிழந்துவிட்டன. நகரமயமாக்கமும் மக்களிடையே இட நகர்வும் வளர்ந்துள்ளன. இதன் பயனாக, தாழ்த்தப்பட்ட மக்கள் மனதில் '' உரிமை உணர்வு'' வளர்ந்துள்ளது. இதைப் பார்க்கிற '' உயர் மற்றும் இடைமட்ட'' சாதிகளைச் சேர்ந்த ஆண்டைகள் .... தங்கள் சாதியின மக்களிடையே '' கருத்துரீதியில்'' சாதியத்தைத் தக்க வைக்க முயல்கிறார்கள். எனவேதான், சாதியச் சிந்தனைகளும் சாதிய மோதல்களும் வளர்ந்துள்ளன. பொருளாதார ரீதியில் பலவீனமடைந்துள்ள சாதியமைப்பு... வேலைப்பிரிவினை... தன்னைக் ''கருத்துரீதியில்'' தக்கவைக்க முயல்கிறது. எனவேதான் ''இட ஒதுக்கீட்டை' எதிர்ப்பதையும், '' சாதி மறுப்புத் திருமணங்களை'' எதிர்ப்பதையும், '' சுடுகாட்டுப் பிரச்சனையை'' உருவாக்குவதையும் '' கோயில் வழிபாட்டுப் பிரச்சினையை'' உருவாக்குவதையும் இங்கு 'உயர், இடைமட்ட'' சாதிகளைச் சேர்ந்த ... ஆனால் உயர்வர்க்கத்தினர்... திட்டமிட்டு வளர்த்துவருகிறார்கள்! அவர்கள் ... இந்த உயர்வர்க்கத்தினர் ... தங்களைப் பாதுகாத்துக்கொள்ள.. தங்கள் சாதிகளைச் சேர்ந்த அடிமட்ட வர்க்கத்தைச் சேர்ந்த மக்களைத் தூண்டிவிடுகின்றனர். ''வன்முறையிலாவது சாதியுணர்வைத் தக்கவையுங்கள்... சட்டப் பிரச்சினை வந்தால், நாங்கள் பார்த்துக்கொள்கிறோம்'' என்று ''பின்னாலிருந்து'' சாதிமோதல்களை இயக்குகின்றனர். இதுவே 100 விழுக்காடு உண்மை! இதற்குத் தீர்வு ... அனைத்து சாதிகளிலும் உள்ள அடித்தள மக்கள் ... இந்த ''உயர்வர்க்கத்தினரின்'' சூழ்ச்சிகளுக்குப் பலியாகாமல், ஒன்றிணைந்து , ஒட்டுமொத்தமான அரசியல், பொருளாதார, சமூக மாற்றங்களுக்காகப் போராடுவதேயாகும். தங்கள் சாதிகளைத்தாண்டி, இளைஞர்கள் சமுதாய மாற்றத்திற்காகப் போராட முன்வரவேண்டும்.

Read more »

சாதி அடிப்படையான இட ஒதுக்கீடு தேவையா?

சாதி அடிப்படையான இட ஒதுக்கீடு தேவையா?
-------------------------------------------------------------------------------

எனது முகநூல் பக்கத்தில் ஒரு நண்பர் இட ஒதுக்கீட்டையும் வேலையில்லாத்திண்டாட்டத்தையும் இணைத்து வினாக்களை எழுப்பியிருந்தார். அதற்கு நான் அளித்துள்ள பதில்கள்:

1) // வேலையில்லாத்திண்டாட்டம் என்பது அரசியல்வாதிகளின் அப்பட்டமான பொய் // உலகம் உருண்டை இல்லை என்பதுபோல் தங்களது கூற்று அமைந்துள்ளது. இதற்குமேல் இதில் சொல்வதற்கு ஒன்றுமில்லை. 2) வேலை வாய்ப்பில் சாதி அடிப்படையில் இட ஒதுக்கீடு தொடர்பான தங்களது கூற்று தொடர்பானது. ஆயிரக்கணக்கான ஆண்டுகளாக கல்வி கொடுக்கப்படாமல், உயர்பதவிகள் கொடுக்கப்படாமல், பொருளாதார அடிப்படையிலும், அரசியல் அடிப்படையிலும் பண்பாட்டு அடிப்படையிலும் ஒடுக்கப்பட்டிருந்த சாதிகளின் மக்கள் கடந்த 50 அல்லது 60 ஆண்டுகளாகத்தானே சற்றுத் தலைநிமிர்ந்து நிற்கமுடிகிறது. ஆயிரக்கணக்கான ஆண்டுகளாகப் பொறுத்திருந்தவர்கள் தற்போது இட ஒதுக்கீட்டில் சில சலுகைகளைப் பெறவதில் என்ன தவறு? இதனால் உயர் சாதிகள் என்று அழைத்துக்கொள்ளும் சாதியின மக்களில் ஒரு சிலர் பாதிக்கப்பட்டாலும், சிறிது காலம் பொறுத்திருக்கலாமே! கலெக்டராக ஒரு தாழ்த்தப்பட்ட சாதியைச் சேர்ந்த ஒருவர் பதவியில் அமர்ந்தாலும் இன்றும் அவரைக் கீழ்ப்பதவிகளில் உள்ள உயர்சாதியின மக்கள் கேவலமாகக் கருதுகிறார்களே! கண்கூடாக இது நடக்கிறது. 3) இட ஒதுக்கீடா இன்றைய வேலையில்லாத்திண்டாட்டத்திற்குக் காரணம்? அதற்கான காரணங்கள்பற்றிச் சிந்திக்கலாமே? 4) பொருளாதார நிலையையும் தாண்டி, இன்னும் சாதி அமைப்பானது மக்களைப் பாதிப்பது என்பது உண்மை. 5) ஆயிரக்கணக்கான ஆண்டுகளாக அடியும் உதையும் பட்டுக்கொண்டிருந்த தாழ்த்தப்பட்ட சாதிகளைச் சேர்ந்தவர்கள் இன்று தங்களைப் பாதுகாத்துக்கொள்ள முற்பட்டபிறகுதானே அவர்கள் இன்று காலில் செருப்புகளோடு, சட்டை அணிந்து, தெருக்களில் நடமாட முடிகிறது? சில இடங்களிலாவது!! எனவே தாழ்த்தப்பட்ட, ஒடுக்கப்பட்ட சாதிகளின் மக்களுக்கு இட ஒதுக்கீடு அளிக்கப்படுவதால் மற்றவர்கள் பாதிக்கப்படுகிறார்கள் என்று கூறுவது சரியல்ல.

எனக்கு இப்போது வயது 67 ! சுமார் 60 ஆண்டுகளுக்கு முன்பு நெல்லை மாவட்டைத்தைச் சேர்ந்த கொற்கை என்ற ஊரில் நான் பார்த்த உண்மைச் சம்பவங்கள்! பாட்டி வீட்டில் நிலத்தில் உழுது பயிர் செய்யும் விவசாயித்தோழர், பாட்டியின் வீட்டுக்குள் நுழையமுடியாது. தாழ்வாரத்தில்தான் நிற்கவேண்டும்! அவருக்குச் சாப்பாடு தேவையென்றால், அவரே வாழையிலைகளை வெட்டிவந்து, தாழ்வாரத்தில் உட்கார்ந்து, சாப்பிடவேண்டும்! பாட்டியை நாச்சியார் என்றும் தாத்தாவை நயினா என்றுதான் கூப்பிடவேண்டும. அவ்வளவு ஏன்? பாட்டியின் சிறுவயது ஆண் பேரனைக்கூட நயினா என்றும் பேத்தியை நாச்சியார் என்றுதான் கூப்பிடவேண்டும. பாட்டியின் வீட்டுக் குழந்தைகள் அந்த விவசாயித்தோழரைத் தொட்டுவிட்டால், தனது ஆடைகளைக் கழற்றித் துவைக்கப் போட்டுவிட்டுத்தான், வீட்டுக்குள் குழந்தை நுழையவேண்டும! இதெல்லாம் என்ன கொடுமைகள்? விவசாயித்தோழர் வீட்டுக்குழந்தைகள் பள்ளிக்குச் சென்று நான் பார்ததுகிடையாது. நிலத்தில்தான் வேலைசெய்யவேண்டும். இப்படிப்பட்ட ஒரு மிகக் கேவலமான சூழலிருந்து ... சற்று .... சற்றுத்தான்.... தாழ்த்தப்பட்ட சாதியினராகக் கருதப்பட்ட மக்கள் வெளிவந்துள்ளனர். உயர்கல்வியைப் பெறுவதிலும் அரசு பதவிகளையும் பெறுவதிலும் சில சலுகைகளைப் பெற்றுள்ளனர். அவர்களில் சிலர் செல்வந்தர்களாக இருக்கலாம். ஆனாலும் அவர்களின் தாத்தா, பாட்டிகள் எந்த ஒரு அவலச் சூழல்களில் வாழ்ந்து வந்தனர் என்பதைச் சற்றுச் சிந்திக்கவேண்டும். எனவே இட ஒதுக்கீடு காரணமாக வேலையில்லாத் திண்டாட்டம் நீடிக்கிறது என்றும் திறமையானவர்களுக்கு வேலை கிடைக்காமல் இருப்பதற்கு இதுதான் காரணம் என்று கூறுவதும் சரியல்ல என்பது எனது கருத்து!

அனைத்து சாதிகளிலும் வர்க்கப் பிரிவினைகள் உண்டு. எனவே ஒரு சாதியில் - அது எந்த சாதியாக இருந்தாலும் - உயர் வர்க்கத்தினர் பின்தங்கிய, வர்க்கத்தினரை - செல்வத்தில் பின்தங்கியவர்களை - மதிப்பதில்லை. அது வர்க்க குணம்.... எனவே தாழ்த்தப்பட்ட ... அதேவேளையில் பின்தங்கிய வர்க்கத்தைச் சேர்ந்தவர்கள் - இரண்டு ஒடுக்குமுறைகளுக்கு ஆளாகின்றனர். ஒன்று சாதிய ஒடுக்குமுறை... மற்றொன்று வர்க்க அடிப்படையிலான ஒடுக்குமுறை.. எனவே அனைத்து சாதிகளிலும் உள்ள ஒடுக்கப்பட்ட வர்க்கத்தினர் ஒன்றிணைந்து .... சாதியைத் தூக்கிப்பிடிக்கும் சுயநலவாதிகளையும் எதிர்க்கவேண்டும்... அதேவேளையில் ஒட்டுமொத்தமான அரசியல் பொருளாதார ஒடுக்குமுறைக்கு எதிராகவும் போராடவேண்டும். இந்த இரண்டாவது வகையான போராட்டமே மக்களிடையே நிலவும் சாதி வேறுபாட்டை அகற்றும். இப்போராட்டத்தின் வெற்றியே.... வர்க்க வேறுபாடுகளையும் அகற்றும்... சாதியப் பிரிவினைக்கும் முடிவுகட்டும்.

Read more »

'' சடங்குகளின் தோற்றமும் நீடிப்பும்''

'' சடங்குகளின் தோற்றமும் நீடிப்பும்'' 

( இன்றைய ''சடங்குகளின் '' தோற்றம்பற்றிய ஆய்வில் ஆர்வம் உள்ளவர்களுக்காக மட்டும்! )

பழமையான மனித சமூகத்தில் மனிதன் தான் வாழ்கிற இயற்கையின் செயல்பாடுகள் - பண்புகள் - பற்றிய விதிகளை முழுமையாகப் புரிந்துகொள்ளாத ஒரு சூழல் நிலவியது. விவசாயத்திற்கு மழை தேவை! ஆனால் மழைக்கு அடிப்படை என்ன என்று முழுமையாகத் தெரிந்திராத ஒரு நிலையில்... அன்றைய சமூகம் மழையை வரவழைக்கச் சில நடனங்களை மேற்கொண்டுள்ளது. மக்கள் கூட்டமாக மேகங்கள்போன்று திரண்டு, இடி இடிப்பதுபோல பலத்த ஓசையை எழுப்பிக்கொண்டு, மழைத்துளிகள் தரையில் விழுவதுபோல தாங்களும் விழுந்தால் .. அதாவது மழை என்ற இயற்கைச் செயல்பாட்டைச் செயற்கையாகத் தாங்கள் ஒரு நடனம்மூலம் நடத்திக்காட்டினால், மழை உண்மையில் வந்துவிடும் என்று நம்பினார்கள். அதுபோன்று, வளமுள்ள நிலமாகத் தங்கள் விளைநிலங்கள் ஆகவேண்டுமென்றால், பருவமடைந்த பெண்கள் நிலத்தில ஏர்பிடித்து உழுதால், அவர்களுடைய குழந்தைபெறும் தன்மையானது நிலத்திற்கும் ஏற்றப்பட்டு, நிலமும் பயிர் செழித்துவளரும் பண்பைப் பெறும் என்று நினைத்தார்கள். அதுபோன்று, குழந்தைப்பேறு இல்லாத பெண்களுக்குக் குழைகுழையாக உற்பத்தி செய்யும் வாழைமரத்தின் தண்டைக்கொண்டு சில காரியங்களைச் செய்தால், வாழைக்குரிய பண்பு அந்தப் பெண்களுக்கு வந்துவிடும் என்று நம்பினார்கள். இதில் மிக முக்கியமான ஒன்று .... இதற்கெல்லாம் '' கடவுள்'' என்ற ஒரு சக்தியை அவர்கள் நம்பவில்லை. மாறாக, இயற்கை நிகழ்வுகளைத் தங்களது சில ஆடல், பாடல்கள் மூலம் வரவழைக்கமுடியும் என்று நம்பினார்கள். இதுபோன்ற நிகழ்வுகளின் அடிப்படையில்தான் தாந்திரியம் தோன்றியுள்ளது. பின்னர் மதங்கள் தோன்றியபோது, அவற்றோடு இந்தச் சடங்குகளும் '' பிணைக்கப்பட்டுவிட்டன. ஆனால் மதங்களுக்கு முன்னரே இந்தச் சடங்குகள் தோன்றி நிலவின என்பதுதான் வரலாற்று உண்மை!

ஆனால் பின்னர் இயற்கையின் செயல்பாடுகளுக்கு - மழை, நிலத்தின் செழிப்பு, பெண்ணின் குழந்தைப்பேறு போன்றவற்றிற்கு உண்மையான இயற்கை விதிகள் கண்டுபிடிக்கப்பட்டபின்னரும் ... அறிவியல் வளர்ந்தபிறகும் .... தேவையில்லாத முந்தைய சமுதாயத்தின் ஆடல், பாடல்கள், பிற நம்பிக்கைகள் தொடர்ந்து பின்பற்றப்படும்போதுதான் ... அவை '' சடங்குகளாக'' மாறுகின்றன. அதாவது அவற்றிற்குத் தேவையில்லாத இன்றைய சூழலிலும் அவை நிகழ்த்தப்படும்போது, சடங்குகளாக மாறுகின்றன. நாம் சில சமயம் கூறுவோம் ..'' அவர் நம்மை உண்மையில் வீட்டுக்கு விருந்துக்கு அழைக்கவில்லை. வெறும் சடங்குக்காகக் கூப்பிடுகிறார்'' என்று. அதுதான் ''சடங்கு''!. இன்று நம்மிடையே நீடிக்கும் விவசாயச் சடங்கு, திருமணச் சடங்கு, இறப்பையொட்டிய சடங்கு... என்ற பல சடங்குகளின் அடிப்படைகள் இதுதான். அதுவும் குறிப்பாக விவசாயச் சடங்குகளுக்கும் திருமணச் சடங்குகளுக்கும் நிறைய தொடர்பு உண்டு. காரணம், இரண்டுமே '' மறு உற்பத்தித் தன்மை'' - Fertility - தொடர்பான நிகழ்வுகள்!

இதுபற்றியெல்லாம் இந்திய தத்துவப் பேராசிரியர் தேபி பிரசாத் சட்டோபாத்யா போன்றோர் பல ஆய்வுகளை மேற்கொண்டு பல நூல்களை எழுதியுள்ளார்கள். சட்டோபாத்யாவின் '' LOKAYATHA" என்ற நூல் மிக முக்கியமானது. தமிழிலும் இது மொழிபெயர்க்கப்பட்டு வெளிவந்துள்ளது மற்றொரு பேராசிரியர் பட்டார்ச்யா என்பவரும் பல சில நூல்களை வெளியிட்டுள்ளார்.

Read more »