தமிழ்ச்சொல்லாக்கத்தில் கணித அடிப்படை விதிகள்( தமிழ்மொழி ஆய்வாளர்களின் கவனத்திற்கு - நேரம் கிடைக்கும்போது படித்துக் கருத்து கூறவும்)

-------------------------------------------------------------------------

ஒரு பொருள் அல்லது இயக்கத்தை அறிவியல் அடிப்படையில் ஆராயும்போது . . . அறிவியலாளர்கள் அவற்றின் உள்ளார்ந்த விதிகளைப் புறவயமாகக் கண்டறிகிறார்கள். விதிகள் புறவயமான விதிகளாக இருந்தால்தான் - அதாவது தனிநபர் விருப்பு வெறுப்பை அடிப்படையாகக்கொள்ளாமல் இருந்தால்தான் - அந்த விதிகள் அறிவியல் விதிகளாக ஏற்றுக்கொள்ளப்படுகின்றன. அதாவது கணித அடிப்படையில் அவை இருத்தல்வேண்டும்.

இங்குக் குறிப்பாக நினைவில் கொள்ளவேண்டியது . . . விதிகள் உருவாக்கப்படுவதில்லை; மாறாக, கண்டறியப்படுகின்றன.

மொழியியல் ஆய்விலும் முன்வைக்கப்படுகிற விதிகள் ('இலக்கண விதிகள்') புறவயமான விதிகளாக இருத்தல்வேண்டும். அவை 'உருவாக்கப்படுவதில்லை''; மாறாக, புறவயமாக நிலவுகின்றன. அப்போதுதான் அவற்றை ''விதிகள்'' என்று அழைப்பது சரியானதாக இருக்கும்.

தமிழ்மொழி அமைப்பானது இதுபோன்ற புறவயமான விதிகளைக் கொண்டுள்ளன. குறிப்பாக, வினைச்சொற்களிலிருந்து பெயர்ச்சொற்கள் உருவாகும்போது . . . தெளிவான விதிகள் செயல்படுகின்றன. கணினித்தமிழ் ஆய்வில் எனது நண்பரும் மென்பொருள் பொறியியலாளருமான திரு. சு. சரவணன் அவர்களுடன் இணைந்து ஈடுபடும்போது, அவர் மிகத் தெளிவாகச் சில விதிகளை முன்வைத்தார். அவற்றை நண்பர்கள்முன் வைப்பதில் மகிழ்வடைகிறேன்.

(1) தமிழ் வினைச்சொற்களை அவற்றின் கால இடைநிலைகளின் அடிப்படையில் 12 வகைகளாகத் (வினைத்திரிபுகள் - Tense Conjugation ) தமிழ் லெக்சிகன் பட்டியல் இட்டுள்ளது. இந்த அடிப்படையில் தமிழ் வினைச்சொற்கள் பெயர்ச்சொற்களாக மாறியமைவதைப்பற்றி ஆராயும்போது தெளிவான விதிகள் தமிழில் அமைந்துள்ளன என்பதைக் காணமுடிகிறது.

(2) தமிழ் வினைச்சொற்கள் தொழிற்பெயர்களாக மாறும்போது, -தல், -த்தல் என்ற தொழிற்பெயர் விகுதிகள் முக்கியத்துவம் பெறுகின்றன. 1-ஆவது வினைத்திரிபிலிருந்து 8-ஆவது வினைத்திரிபுவரை உள்ள வினைச்சொற்கள் - தல் என்ற விகுதியைக் கொள்கின்றன. 9 -ஆவதிலிருந்து 12-ஆவதுவரை உள்ள வினைத்திரிபுகள் -த்தல் என்ற விகுதியைக் கொள்கின்றன. ( அட்டவணை-1ஐப் பார்க்கவும்). இதில் விதிவிலக்கே இல்லை என்பதுபோல் எங்களுக்குத் தென்படுகிறது. நண்பர்களுக்கு ஏதாவது விதிவிலக்குகள் தெரியவந்தால், தயவுசெய்து இங்கே பதிவிடவும்.

(3) தமிழ்வினைச்சொற்களிலிருந்து பெயர்ச்சொற்களைத் தருவிக்கும்போது, குறிப்பிட்ட வினைச்சொல்லின் வினைத்திரிபு வகைப்பாடே அடிப்படையாக அமைகிறது. (அட்டவணை 2)

2, 3,4 ஆகிய வினைத்திரிபு வகைகளில் அடங்குகிற வினைச்சொற்கள் -ச்சி விகுதியை எடுக்கின்றன.

4, 12 ஆகிய வினைத்திரிபுகள் - வு எடுக்கின்றன.

5 ஆவது வினைத்திரிபு -அம், -இ எடுக்கிறது.

9, 10, 11, 12 ஆகிய வினைத்திரிபுகள் - ப்பு என்பதை எடுக்கின்றன.

-ப்பு இணையும்போது

9,10, 12 ஆகிய வினைத்திரிபுகள் -வி என்பதை எடுக்கின்றன.

11, 12 ஆகிய வினைத்திரிபுகள் -ப்பி என்பதை எடுக்கின்றன.

3, 4 ஆகிய வினைத்திரிபுகள் -பு என்பதை எடுக்கின்றன. 2-க்கும் இது பொருந்தும்.

(4) 10 ஆவது வினைத்திரிபில் அடங்குகிற 'கல்' என்ற வினைச்சொல் 'கற்பு' என்று அமையும்போது, முதலில் கல் + ப்பு என்று அமைகிறது; பின்னர் 'ல்ப்' என்பது 'ற்' என்று திரிகிறது; இதற்கு அடிப்படை 'ல்ப்ப்' என்ற மூன்று மெய்களின் தொடர்ச்சியே ஆகும். இந்தத் தொடர்ச்சியில் 'ல்ப்' என்பது 'ற்' என்று திரிகிறது. இறுதியாக நமக்குக் 'கற்பு' என்ற பெயர்ச்சொல் கிடைக்கிறது.

(5) 3 ஆவது வினைத்திரிபில் அடங்குகிற 'இயல்' என்ற வினைச்சொல் 'இயல்பு' என்று அமையும்போது, 'பு' என்ற விகுதியைமட்டுமே எடுக்கிறது.அதாவது இங்கு மூன்று மெய்களின் தொடர்ச்சி இல்லை. எனவே இதிலுள்ள 'ல்ப்' ஆனது 'ற்' என்று திரியவில்லை. எனவே இறுதிச் சொல்லாக 'இயல்பு ' என்பது அமைகிறது; 'இயற்பு' என்று அமைவதில்லை. இதற்கு அடிப்படை இந்த வினைச்சொல்லின் வினைத்திரிபு வகையே அடிப்படை.

(6) 'ஆள்' 'ஆட்சி' என்று மாறுவதற்குக் காரணம் . . . 'ஆள் + ச்சி''; இங்கு 'ள்ச்ச்' என்ற மூன்று மெய்கள் தொடர்ச்சி வருகிறது. எனவே 'ள்ச்' என்பது 'ட்' என்று திரிகிறது.

''மகிழ்' என்ற வினைச்சொல் 'மகிழ்ச்சி' என்று அமையும்போது, மெய்த்திரிபு நடைபெறவில்லை. தமிழில் மூன்று மெய்கள் தொடர்ச்சியானது . . . முதல் மெய்யானது 'ய்' 'ர்' 'ழ்' என்று அமைந்தால், மாற்றம் இல்லாமல் வரலாம்.

(7) புணர்ச்சியில் மூன்று மெய்த்தொடர்ச்சியில் (சொல்லாக்கம், வினைத்திரிபு இரண்டிலும்) மேலும் சில மெய்த்திரிபுகள்:

ல்க்க் -> ற்க் (கற்கிறேன், கற்க )

ல்ச்ச் -> ற்ச் (முயற்சி)

ல்ப்ப் -> ற்ப் (கற்பேன்)

ல்த்த் -> ற்ற் ( கற்றேன்)

ல்ந்த் -> ன்ற் (முயன்றேன்)

ள்க்க் -> ட்க் (கேட்கிறேன், கேட்க)

ள்ச்ச் -> ட்ச் (ஆட்சி)

ள்ப்ப் -> ட்ப் (கேட்பேன்)

ள்த்த் -> ட்ட் (கேட்டேன்)

ள்ந்த் -> ண்ட் (ஆண்டேன்)