மொழி வடிவ மாதிரி ( Language Modelling) - மூளையும் செயற்கை அறிவுத்திறனும் ( Human brain and Artificial Intelligence)

மொழி வடிவ மாதிரி ( Language Modelling) - மூளையும் செயற்கை அறிவுத்திறனும் ( Human brain and Artificial Intelligence)

--------------------------------------------------------------------------------------------------------------------------

உலகில் கணினித் துறையில் இன்று வியக்கத்தக்க மாபெரும் சாதனைகளைச் செயற்கை அறிவுத்திறனை அடிப்படையாகக்கொண்ட மென்பொருள்கள் (Artificial Intelligence oriented software) நமக்கு வழங்கிக் கொண்டிருக்கிறது. அறிவியல் ஆய்வு, பொருளாதார உற்பத்தி, வணிகம், அரசு நிர்வாகம் என்று பல்வேறு துறைகளில் செயற்கை அறிவுத் திறனின் பயன்பாடு பெருகிவருகிறது.

 

மனித உழைப்பைச் சாராமலும் வேகமாகவும் ஒரு பணியைச் செயற்கை அறிவுத்திறன் மென்பொருள் செய்துமுடிக்கிறது என்றால், உறுதியாக எவரும் அந்த மென்பொருளைப் பயன்படுத்தவே விரும்புவார்கள். இதில் தவறும் ஒன்றும் இல்லை!

 

குறிப்பாக, லாப நோக்கையே அடிப்படையாகக் கொண்ட பன்னாட்டுப் பெரும் நிறுவனங்கள் - உற்பத்தி, வணிகம் இரண்டிலும் - இதற்கே முக்கியத்துவம் அளிக்கும்.

 

மொழிசார்ந்த பணிகளிலும் (language dependent tasks) இன்று செயற்கை அறிவுத்திறன் ஈடுபடுத்தப்பட்டு வருகிறது. கூகுள், மைக்ரோசாஃப்ட் போன்ற பன்னாட்டு நிறுவனங்கள் இத்துறையில் மிகுந்த கவனம் செலுத்திவருகின்றன.

 

இதற்கு முக்கியக் காரணம் . . . நாம் எந்த ஒரு துறைதொடர்பான வினாவை - ஐயத்தை- எழுப்பினாலும் கணினிமென்பொருள் தேவையான விடையை - விளக்கத்தைத் தரவேண்டும். அதற்கு முதல் தேவை . . . நாம் முன்வைக்கிற வினா அல்லது ஐயத்தை நமது மொழிவாயிலாகத்தான் வெளிப்படுத்துகிறோம். அதைக் கணினி புரிந்துகொள்ளவேண்டும். கணினியும் அதற்கான விடையை அல்லது விளக்கத்தை மொழிவாயிலாகத்தான் வெளிப்படுத்துகிறது. அதற்குக் கணினிக்கு மொழித் திறன் (Language Capacity) வேண்டும்.

 

அதாவது . . . மொழித்தொடர்களின் பொருளை - பொருண்மையை- கணினி பொருள் மயக்கமில்லாமல் ( meaning ambiguity) புரிந்துகொள்ளவேண்டும். நாம் முன்வைக்கிற விரும்புகிற கருத்தை நமது மொழியில் புதைத்துத்தான் ( encoding) வெளிப்படுத்துகிறோம். இவ்வாறு நாம் புதைத்து அனுப்புகிற மொழித் தொடர்களிலிருந்து கணினிமென்பொருளானது புதைக்கப்பட்டுள்ள பொருண்மையை - பொருளை- மீட்டெடுக்கவேண்டும் ( decoding).

 

இவ்வாறு குறிப்பிட்ட ஒரு பொருண்மையை மொழியில் புதைத்து வெளிப்படுத்தவும், மீண்டும் அந்தப் பொருண்மையை மொழியிலிருந்து மீட்டெடுக்கவும் நமது மூளையில் உள்ள மொழி அறிவு - பேச்சொலி, எழுத்து, சொல், தொடர் பற்றிய அறிவு - உதவுகிறது. ஒவ்வொரு மொழிக்கும் இதுதொடர்பான தெளிவான விதிகள் - இலக்கணம் - நீடிப்பதாலும் அந்த அறிவை நமது மூளையின் மொழிப்புலன் பெற்றிருப்பதாலும் இது சாத்தியமாகிறது.

 

ஒவ்வொரு மனிதமொழியும் தனக்கென்று ஒரு கட்டமைப்பை - இலக்கணத்தை- பெற்றிருப்பதால்தான் இது சாத்தியமாகிறது. இந்தக் கட்டமைப்புபற்றிய அறிவை மொழியாய்வு, இலக்கண ஆய்வு நமக்குத் தருகிறது. இந்தக் கட்டமைப்பே மொழி வடிவ மாதிரி ( Language Modelling) என்று அழைக்கப்படுகிறது.

 

மனித மூளையில் நிலவுகிற இந்த மொழி வடிவ மாதிரியை ஆராய்ந்து, உணர்ந்து, அதைக் கணினியின் மின்னணு மூளைக்குத் தகுந்தவகையில் எவ்வாறு மாற்றியமைப்பது என்பதுபற்றிய அறிவியல்துறையே கணினிமொழியியல் துறையாகும். இந்தவகை ஆய்வு கடந்த 100 ஆண்டுகளுக்குமேலாக நடைபெற்று வருகிறது. இதில் மிக முக்கியமானது என்றால் மொழி அமைப்புக்கும் (Grammar / Structure) பொருண்மைக்கும் (Meaning) இடையில் உள்ள உறவை அறிவதே ஆகும்.

 

மேற்கண்ட ஆய்வில் தற்போது ஒரு புதிய வளர்ச்சி- மாற்றம் ஏற்பட்டுள்ளது. இதற்கு அடிப்படை இன்றைய கணினி அறிவியலின் வளர்ச்சியே ஆகும். கோடியே கோடி மொழித்தரவுகளை விநாடியில் பெற்றுத்தரக் கூடிய இணையமும் அவற்றை ஆய்வுசெய்யக்கூடிய கணினித்திறனும் வியக்கத்தக்க அளவில் வளர்ந்து உள்ளன.

 

இதன் பயனாகவே இன்று நிகழ்தகவுப் புள்ளியியல் ( Probabilistic Statistics) அறிவை அடிப்படையாகக்கொண்டு, ஒரு குறிப்பிட்ட சொல்லை நாம் முன்வைத்தால் அதற்கு முன்னர் எந்தச் சொல் அதிகமாக வரும், அதற்குப் பின்னர் எந்தச் சொல் அதிகமாக வரும் என்பதை ஒரு சில மில்லி விநாடிகளில் கணினியால் இன்று கூற முடியும். இதற்கு நாம் மேலே கூறியுள்ள மொழிக் கட்டமைப்பு - இலக்கணம் - தேவை இல்லை.

 

ஏனென்றால் மொழி அமைப்பு - பொருண்மை என்ற அடிப்படையில் கணினி செயல்பட வேண்டியதில்லை. இந்த வழிமுறையில் எதிர்பார்க்கிற விடை 100 விழுக்காடு சரியாக இல்லை என்றாலும் கவலை இல்லை; 80 விழுக்காடு சரியாகக் கிடைத்தாலே போதும்; நாம் அதில் உள்ள குறைகளைக் களைந்துகொள்ளலாம்.

 

ஆக, ஒருவர் ஒரு குறிப்பிட்ட மொழியில் தனது தேவையை முன்வைக்கும்போது, அந்த மொழிபற்றிய இலக்கண, சொற்களஞ்சிய அறிவு இல்லாமலேயே . . . அல்லது அந்த அறிவையெல்லாம் புள்ளியியல் அடிப்படையிலான ஒரு அறிவாக மாற்றி . . . நிகழ்தகவுப் புள்ளியியலை அடிப்படையாகக்கொண்டே நமக்குத் தேவையான விடையை- விளக்கத்தை - கணினியால் அளிக்கமுடியும்.

 

குறிப்பாக, ஒரு 100 பக்கத் தமிழ்க் கட்டுரையை ஜப்பானிய மொழியில் மொழிபெயர்க்கவேண்டும் என்றால், தமிழ் - ஜப்பானிய மொழி அறிவு தேவை இல்லை. கூகுளில் தமிழ் - ஆங்கில மொழிபெயர்ப்பு வசதி இருக்கிறது. ஆங்கில - ஜப்பானிய மொழிபெயர்ப்பு வசதி இருக்கிறது. எனவே, தமிழ்ப் பக்கங்களை முதலில் கூகுளின் உதவியுடன் ஆங்கிலத்தில் விநாடியில் மொழிபெயர்த்துக் கொள்ளலாம். அந்த மொழிபெயர்ப்பு 70 விழுக்காடு சரியாக இருந்தாலும் கவலை இல்லை; அதை ஆங்கிலம் தெரிந்த ஒருவர், தேவையான 30 விழுக்காட்டுச் சிக்கல்களை நீக்கிவிடலாம். அதில் கிடைத்த ஆங்கில மொழிபெயர்ப்பைக் கூகுளின் ஆங்கில - ஜப்பான் மொழிபெயர்ப்பு மென்பொருளின் உதவியுடன் விநாடியில் மொழிபெயர்த்துவிடலாம். அந்த ஜப்பானிய மொழிபெயர்ப்பின் காணப்படும் தவறுகளையும் ஒரு ஜப்பானியரைக்கொண்டு திருத்திக்கொள்ளலாம்.

 

அதாவது , தமிழ் , ஆங்கிலம், ஜப்பானியம் ஆகிய மொழிகளின் சொற்களஞ்சியம், இலக்கணம் ஆகியவைபற்றிய அறிவை அடிப்படையாகக் கொள்ளாமலேயே . . . தமிழ் - ஜப்பானிய மொழிபெயர்ப்பைப் பெறமுடியும். இதுவே இன்று கணினியின் மொழிச்செயல்பாட்டின் அடிப்படை ஆகும். அதாவது, ஒரு கட்டுரையில் அமைகிற எழுத்து, சொல், தொடர் ஆகியவற்றின் இலக்கண அமைப்பையும் பொருண்மை வெளிப்பாட்டையும் பற்றிய மொழி அறிவு இல்லாமலேயே . . . அவற்றின் நிகழ்தகவுப் புள்ளியியல் அடிப்படையிலான வருகையை அடிப்படையாக வைத்தே . . . நமது மனிதமூளை செய்கிற மொழிச் செயல்பாட்டை மேற்கொள்ளமுடியும்.

 

எனவே, எதிர்காலத்தில் ஒரு மாணவர் எந்த ஒரு மொழியிலும் - மொழிக் கல்வி இல்லாமலேயே - தனது மொழிச்செயல்பாட்டை மேற்கொள்ளமுடியும். ஒரு கணினியின் முன் உட்கார்ந்துகொண்டே - தனது கருத்தைப் பல மொழிகளில் வெளிப்படுத்தமுடியும். அல்லது 70 விழுக்காடு கணினி சரியாகச் செய்கிறது என்றால், எந்த மீதி 30 விழுக்காட்டு அறிவைக் கணினியால் பெறமுடியவில்லையோ, அதைமட்டும் அவர் கற்றுக்கொண்டால் போதும். கணினிக்குக் கொடுக்கப்படுகிற உரையைச் சற்று முன்பதிப்பு (pre-edit ) செய்யவேண்டியது இருக்கும்.

 

அதாவது, நமது மொழிநடையைக் கணினிக்கு ஏற்றவகையில் சற்று மாற்றவேண்டியிருக்கும். அதுபோலக் கணினி அளிக்கிற உரையைச் சற்றுப் பின்பதிப்பு (post edit) செய்யவேண்டியிருக்கும். இந்த இரண்டுமே எதிர்காலத்தில் நமது மொழிநடையானது கணினியைச் சார்ந்து இருக்கலாம். கணினியானது நமது மொழிநடையைத் தீர்மானிக்கலாம்.

இனி, ஒரு மொழியின் அமைப்பை இலக்கணம், மொழியியல் அடிப்படையில் கற்றுக்கொள்ளத் தேவை இருக்காது; மாறாக, நிகழ்தகவுப் புள்ளியியல், கணினியியல் இரண்டிலும் தேர்ச்சிபெற்றாலே போதும்.

 

இங்கு, மீண்டும் நாம் தெளிவாகத் தெரிந்து கொள்ளவேண்டியது . . நமது மனித மூளையில் உள்ள இயற்கைமொழி அமைப்புபற்றிய ஆய்வுக்குத் தேவை இருக்காது. மாறாக, கோடியே கோடி மொழித்தரவுகளை முறையாகக் கணினிக்கு அளித்து, நிகழ்தகவுப் புள்ளியியல் அடிப்படையிலான மாதிரி வடிவங்களை உருவாக்கிக் கணினிக்கு அளித்தால் போதும் என்ற ஒரு 'வளர்ச்சிநிலை' ஏற்படும்.

 

நமது மூளையில் நீடிக்கிற நமது மொழி அமைப்பு (Language Modelling) வடிவம் வேறு; கணினிக்கு அளிக்கப்படுகிற மொழி அமைப்பு வடிவம் வேறு.

 

இன்று மொழித்தொழில்நுட்பத்துறையில் இரண்டுவகையான ஆய்வுமுறைகள் - கணினிமொழியியல் (Computational Linguistics) ஆய்வுமுறை , நிகழ்தகவு ஆய்வுமுறை (Probabilistic Statistics) - நிலவுகின்றன. முதல்வகை ஆய்வுமுறைக்கு ஒரு மொழியின் இலக்கண அமைப்புபற்றிய அறிவு தேவை; இரண்டாவது வகையான ஆய்வுமுறைக்கு நிகழ்தகவுப் புள்ளியியல், தரவுத்தளம் அமைப்பு, கணினியின் செயல்திறன் ஆகியவைபற்றிய அறிவு தேவை.

 

கணினிமொழியியல் அடிப்படையிலான ஆய்வுமுறையிலும் புள்ளியியல் பயன்படுகிறது. ஆனால் அதன் நோக்கமும் பயன்பாடும் வேறு.

இந்தச் செயற்கை அறிவுத்திறன் வடிவமைப்பிலும் பல வேறுபட்ட வழிமுறைகள் பின்பற்றப்படுகின்றன ( Supervised / Unsupervised Machine Learning, Neural Network, Deep Learning etc... ). பொதுவாக, இவை எல்லாவற்றிற்கும் மிக அடிப்படையானவை மிகப் பெருந்தரவுத்தளம் (Mega Corpus ), நிகழ்தகவுப் புள்ளியியல் ( Probabilistic Statistics ) , கணினியின் செயல்பாட்டுத்திறன்(Computing Power) ஆகியவை ஆகும்.

மனிதமூளை மொழி கற்றல், கற்பித்தல்பற்றி வேறுபட்ட பல கோட்பாடுகள் மொழியியலில் நிலவுகின்றன. ஸ்கின்னர் கருத்து, சாம்ஸ்கி கருத்து என்று பல கருத்துக்கள் நீடிக்கின்றன. ஆனால் இங்கு நாம் பேசுவது . . . கணினியானது மனிதமொழியைக் கற்றுக்கொள்வது ஆகும். மனிதனுக்கும் கணினிக்கும் இடையிலான கருத்துப்பரிமாற்றத்திற்குக் கணினிக்கு மனிதமொழி இலக்கண அறிவு தேவை இல்லை! மொழி இலக்கணம், சொற்களஞ்சியம் ஆகியவற்றைக் கற்றுக்கொடுக்காமலேயே கணினிக்குப் பெருந்தரவு, புள்ளியியல் அடிப்படையில் மொழியைக் கற்றுக்கொடுக்கமுடியும் என்ற ஒரு கோட்பாடு. இவ்வாறு கற்றுக்கொடுக்கமுடியும் என்றால் எதிர்காலத்தில் ஒருவர் கணினிப்பயன்பாட்டில் தனது தாய்மொழி தவிர வேறு எந்தமொழியையும் கற்றுக்கொள்ளவேண்டாம்! ஆனால் மனிதர்களுக்கிடையிலான கருத்துப்பரிமாற்றத்திற்கு மொழி அறிவு தேவைப்படும். ஆனால் ஒருவர் மற்றொருவருடன் கணினிவழி, கணினி உதவியுடன் கருத்துப்பரிமாற்றம் செய்துகொள்ளலாமே! கணினி ஒரு மொழிபெயர்ப்பாளர்போன்று செயல்படலாமே!

 

Read more »

மனிதமூளை - கணினி மூளை - மொழித்திறன் வடிவம்

 மனிதமூளையில் உள்ள மொழித்திறன் வடிவமும் (Human Brain Language Modelling) கணினி மூளையில் உருவாக்கப்பட்டுள்ள மொழித்திறன் வடிவமும்.(Computational Language Modelling)

-------------------------------------------------------------- -----------------------------------------------------------------

இன்றைய இயற்கைமொழிகள் பற்றிய செயற்கை அறிவுத்திறனுக்கு (Artificial Intelligence - AI) மொழித்தொடர்களின் அல்லது முழு உரையாடலின் பொருளை - பொருண்மையை- புரிந்துகொண்டு செயல்படும் திறன் இல்லை.

மொழித்தொடர்களில் அமைந்துள்ள சொற்களின் பொருண்மை, சொல்லமைப்பு இலக்கணம் , தொடரமைப்பு இலக்கணம், சொற்களின் பொருண்மை ஆகியவற்றின் அடிப்படையில் குறிப்பிட்ட மொழித்தொடரை ஆராய்ந்து, அத்தொடர் என்ன கூறவருகிறது என்ற அடிப்படையில் செயற்கை அறிவுத்திறன் செயல்படவில்லை.

மாறாக, சொற்களின் வருகையை - எந்தச் சொல்லுக்கு முன்னர் எந்தச் சொல் வருகிறது, எந்தத் தொடருக்குமுன்னர் எந்தத் தொடர் வருகிறது என்பதை கோடியே கோடி மொழித்தொடர்களைக்கொண்ட தரவுகளின்மீது, நிகழ்தகவு ஆய்வுமுறையைப் (probability) பயன்படுத்திப் புரிந்துகொள்கிறது.

எவ்வாறு இந்த அறிவைப் பயன்படுத்துவதில்தான் பல்வேறுவகைப்பட்ட அறிவுத்திறன் மென்பொருள்கள் தங்களுக்குள் வேறுபடுகின்றன.

ஆனால் மனிதமூளையானது இயற்கைமொழிகளை இந்தவகையில் புரிந்துகொள்ளவில்லை. மொழித்தொடர்களின் பொருண்மையைப் புரிந்துகொள்ளக் குறிப்பிட்ட மொழியின் சொற்பொருள், சொல் இலக்கணம், தொடர் இலக்கணம், பொருண்மையியல் போன்ற பல்வேறு கூறுகளை அடிப்படையாகக்கொண்டுதான் புரிந்துகொள்கிறது.

இந்த அறிவு - திறன்- மனித மூளைக்கே உரிய அறிவுத்திறன் ஆகும். இலட்சக்கணக்கான ஆண்டுகளாகத் தனது பரிணாம வளர்ச்சியில் மனித மூளை வளர்ச்சியடைந்து, இந்தத் திறனைப் பெற்றுள்ளது.

மொழியைப் புரிந்துகொள்ள மனிதமூளையில் நிலவுகிற மொழி வடிவமானது (Human Brain Language Modelling) , மேற்குறிப்பிட்ட செயற்கை அறிவுத்திறன் மென்பொருள்கள் பயன்படுத்துகிற மொழி வடிவத்துடன் (Computational Language Modelling) மாறுபட்டது ஆகும்.

மனிதமூளையின் இந்த மொழி வடிவமானது முழுமையாக ஆராயப்பட்டு, அதன் அமைப்பைக் கணினியில் கொண்டுவரும்போதுதான் செயற்கை அறிவுத்திறன் மென்பொருள் மனிதமூளைபோன்று செயல்படமுடியும். அதற்கு மேலும் பல மொழியியல் ஆய்வுகள் தேவை. இப்போதைக்கு வினாவுக்கு விடை கிடைத்தால்போதும், எந்த முறையில் வந்தால் என்ன ? என்ற கருத்தே நிலவுகிறது.

கணினிமொழியியல் ஆய்வின் தொடர்ந்த வளர்ச்சியையொட்டித்தான் மனிதமூளைத் திறனைக் கணினிமூளை பெறமுடியும். மொழியியல், கணினிமொழியியல் மேலும் மேலும் வளர்ச்சியடையவேண்டும். வளர்ந்தும் வருகிறது.

Read more »

தமிழ் மொழியின் ''சிலை''!

 தமிழ் மொழியின் ''சிலை''!

-----------------------------------------------------------------------------------------------------------

இன்றைய தமிழ்மொழி, வரலாற்றுத் தமிழ்மொழி ஆகிய இரண்டின் அமைப்புக்களையும் தெளிவாகப் புரிந்துகொள்ள முதலில் தேவைப்படுவது - இன்றைய தமிழ்மொழித் தரவு, வரலாற்றுத் தமிழ் இலக்கியத் தரவு. முறையான தரவகமொழியியல் அடிப்படையில் இவை உருவாக்கப்படவேண்டும். தரவுகளை முறையாக உருவாக்குவது முதற்படியே!

அடுத்து - வரலாற்றுத் தமிழ்மொழியில் ( அதாவது இலக்கியங்களில்) இடம்பெற்றுள்ள அனைத்து சொற்களையும் பட்டியலிடவேண்டும்.

மூன்றாவது - ஒவ்வொரு சொல்லுக்கும் இலக்கணக் குறிப்பு தயாரிக்கவேண்டும். தொடர் அமைப்புக்கும் இலக்கணக் குறிப்பு தயாரிக்கவேண்டும்.

இதுபோன்று இன்றைய தமிழ்மொழித் தரவுக்கும் இலக்கணக் குறிப்புக்கள் தயாரிக்கப்படவேண்டும்.

பழந்தமிழ் இலக்கியத் தமிழை ஆய்வுசெய்வதற்குப் பழந்தமிழ் இலக்கணங்கள், உரையாசிரியர்கள் உரை ஆகியவற்றைப் பயன்படுத்தவேண்டும்.

இந்தப் பணிகள் தமிழுக்கு மேற்கொள்ளப்பட்டால்தான் தமிழ்மொழி ஆய்வானது நிறைவாக அமையும். இதற்கு ஒரு சில கோடிகளே செலவாகும். தமிழ்மொழி ஆய்வாளர்களையும் மொழியியல் ஆய்வளார்களையும் இதில் ஈடுபடுத்தவேண்டும். இப்பணிக்கு இன்றைய கணினிமொழியியல், தரவகமொழியியல் மிகவும் பயன்படும்.

இப்பணியே உண்மையில் தமிழ்மொழிக்கு - தமிழன்னைக்கு - ''உருவச்சிலை'' அமைப்பதாகும். இதைச் செய்யாமல், 'தமிழன்னைக்குச் சிலை'' என்று பளிங்குக்கல்லில் சிலை அமைத்தாலும், அது வெறும் அரசியலே!

தமிழ்மொழியின் அமைப்பை - அன்றிலிருந்து இன்றுவரை - தெரிந்துகொண்டு . . . அதற்கான இலக்கணத்தை உருவாக்குவதுதான் உண்மையான ''தமிழன்னைச் சிலை'' ஆகும்!

இத்துடன் கல்வெட்டுத் தமிழையும் நாட்டுப்புற இலக்கியங்கள், வாய்மொழி இலக்கியங்கள் ஆகியவற்றின் தமிழையும் இணைத்துக்கொள்வது தேவையானது ஆகும்! இன்றைய தமிழ் ஆய்வில் வட்டார வழக்குகளைப்பற்றிய ஆய்வையும் உள்ளடக்க வேண்டும்!

Read more »

தமிழ்மொழிக்கல்வியும் தமிழ்மொழியைப்பற்றிய கல்வியும்

 

தமிழ்மொழிக்கல்வியும் தமிழ்மொழியைப்பற்றிய கல்வியும்

---------------------------------------------------------------------------------------------------------- ஆங்கிலம் ஆகட்டும், தமிழ் ஆகட்டும் அவற்றின் இன்றைய மொழி அமைப்பையும்     மொழிச்செயல்பாட்டையும் அறிந்துகொள்வது அந்த மொழிகளைக் கற்றலின்             முக்கிய அங்கமாகும். ஒரு மொழியைக் கற்றலையும் (learning the language) அந்த             மொழியைப்பற்றிக் கற்றலையும் ( learning about the language) - இரண்டையும்                         இணைத்துக் குழப்புவது தவறே.

இன்று வகுப்பறையில் மாணவர்களுக்குக் கற்றுக்கொடுக்கப்படும் இலக்கணம் சில நூற்றாண்டுகளுக்குமுன்பு நிலவிய தமிழ்மொழியின் அமைப்புக்கான இலக்கணமே!

இந்த இலக்கணம்பற்றிய கல்வியும் தேவைதான்! அப்போதுதான் தமிழ்மொழியின் வளர்ச்சிபற்றிய அறிவு மாணவர்களுக்குக் கிடைக்கும். இதில் ஐயமே இல்லை!

அதேவேளையில் தமிழ்மொழிபற்றிய தமிழ் மாணவர்களுக்கான கல்வியில், தமிழ்மொழியானது தனது அடிப்படை அமைப்பு மாறாமல், ஆனால் அதேவேளையில் தமிழ்ச்சமுதாயத்தின் மொழிச்செயல்பாட்டுத் தேவைகளுக்கேற்ப எவ்வாறு மாறி . . . வளர்ந்துவருகிறது ( language development through history) என்பதை மாணவர்கள் அறிந்து கொள்ள வேண்டும்.

மேலும் பல நூற்றாண்டுகளுக்குமுன்னரே தொல்காப்பியர் மொழிபற்றிய ஆய்வில் எந்த அளவு தெளிவைப் பெற்றிருந்தார் என்பதை மாணவர்கள் அறிந்துகொள்ளவேண்டும். அவருடைய இலக்கணக் கோட்பாடு ( grammatical theories) எந்த அளவு புறவயமான கோட்பாடாக ( objective analysis) அமைந்திருக்கிறது என்பதை மாணவர்கள் தெரிந்துகொள்ளவேண்டும். அவரது ஆய்வுமுறையாகட்டும் (research methodology) , ஆய்வின் முடிவை எந்த வரிசையில் ( presentation methodology) முன்வைத்து விளக்கவேண்டும் என்பதாகட்டும், மிகவும் வியக்கத்தக்க அளவில் அமைந்துள்ளன என்பதை மாணவர்கள் தெரிந்துகொள்ளவேண்டும்.

இதற்கு தொல்காப்பியர், நன்னூலார் உட்பட தமிழ் இலக்கண ஆசிரியர்கள் பலரின் இலக்கணங்களின் சிறப்புக்கள் தமிழ்மொழிபற்றிய கல்வியில் (learning about Tamil Language) இடம்பெறவேண்டும்.

ஆனால் இங்கு ஒன்றில் தெளிவு வேண்டும். தமிழ்மொழியை இன்றைய பயன்பாட்டுக்காக - கருத்துப்புலப்படுத்தத்திற்காக - கற்கின்ற மாணவர்களுக்கும் (பொதுநிலை), தமிழ்மொழியைப்பற்றி விரிவாகக் கற்கிற மாணவர்களுக்கும் (சிறப்புநிலை) அளிக்கப்படுகிற தமிழ்மொழிபற்றிய கல்வியில் வேறுபாடு தேவை.

இன்றைய பயன்பாட்டுக்கான தமிழ்மொழிக்கல்வியில் இரண்டு பிரிவினர்களின் தேவையும் ஒன்றுதான்! ஆனால் தமிழ்மொழியைப்பற்றிக் கல்வியில் இந்த இரண்டுவகையினர்களுக்கும் இடையில் வேறுபாடு இருக்கவேண்டும். இரண்டையும் இணைத்துக் குழப்பிக்கொள்ளக்கூடாது.

மீண்டும் வலியுறுத்துகிறேன் . . . மொழிக்கல்வி (language teaching) வேறு! மொழியைப்பற்றிய கல்வி ( teaching about the language) வேறு! தமிழ்நாட்டில் இந்த வேறுபாடு பள்ளிக்கூடப் பாடங்களில் தேவையான அளவுக்கு உணரப்படவில்லை என்பதே எனது கருத்து! எனவேதான் மாணவர்களுக்குத் தமிழைப் பயன்படுத்துவதிலும் சிக்கல் . . . ஆங்கிலத்தைப் பயன்படுத்துவதிலும் சிக்கல்!

இன்றைய எழுத்துத்தமிழின் அமைப்பைத் தேவையான அளவுக்கு எடுத்துக்கூறுகிற ''தற்காலத் தமிழ் இலக்கணம்'' முழுமையாக உருவாக்கப்படவில்லை! இது ''கணினித்தமிழ் '' வளர்ச்சியிலும் தனது பாதிப்பை ஏற்படுத்தியுள்ளது.

தொல்காப்பிய இலக்கணத்தின் அடிப்படையில் மொழி ஆய்வு மென்பொருள் கருவிகள் உருவாக்கப்பட்டு, அவற்றை இன்றைய எழுத்துத்தமிழுக்குப் பயன்படுத்திப்பார்த்தால், இன்றைய தமிழுக்கும் அன்றைய தமிழுக்கும் இடையில் உள்ள ஒற்றுமை , வேற்றுமைகளைப் புரிந்துகொள்ளமுடியும். தெளிவான வரலாற்று இலக்கணமும் உருவாக்கமுடியும். தொல்காப்பியர். நன்னூலார் போன்றோரின் சிறப்பையும் தெளிவாக முன்வைக்கமுடியும்.

அதுபோன்று, பழந்தமிழ் இலக்கியங்களில் பயன்படுத்தப்பட்ட எழுத்துத்தமிழை இன்றைய தமிழுக்கான மென்பொருள் கருவிகள்கொண்டு ஆராய்ந்தால், எங்கு வேறுபாடு, எங்கு ஒற்றுமை என்பதைத் தெளிவாகப் புரிந்துகொள்ளமுடியும்!

அன்றைய எழுத்துத் தமிழ் செய்யுள் வடிவங்களில்தான் மிகுதியாக நிலவியது. ஆனால் . . . இன்று உரைநடையே முக்கியத்துவம் பெற்றுள்ளது. பள்ளிகளில் கற்றுக் கொடுக்கப்படுகிற தமிழ் உரைநடைக்கான தமிழே!

இதனால் உறுதியாக இன்றைய எழுத்துத்தமிழில் மாற்றமும் வளர்ச்சியும் இருக்கும்.

இதுபோன்ற ஆய்வுகள் மேற்கொள்ளப்பட்டால், தமிழ் வரலாற்று இலக்கணத்தையும் முழுமையாகப் புரிந்துகொள்ளமுடியும். இன்றைய தமிழுக்கான - மக்களுக்குத் தேவையான - மென்பொருள் கருவிகளையும் உருவாக்கமுடியும்.

Read more »